تجربتي مع دراسة السنة التحضيرية جامعة الإمام عبدالرحمن بن فيصل

راح يكون مقسم لكذا جزء من القبول الى نهاية السنة.

أول شيء مبارك للجميع القبول في المسار الصحي، وهنا تبدأ حياتكم الجديدة كل ال١٢ سنة اللي فاتت كانت عبارة عن تمهيد للفترة هذي ،طبعًا أي واحد دخل المسار الصحي فهو مجتهد ودافور!!! ودرجاته عالية فلازم تدري انك شخص بطل، ومادخلت هالمكان الا وانت تستحق… فلاتتحطم لأنك بتشوف ناس أفضل منك من نواحي كثيرة،، منها اللغة و المعلومات فلا تقول هذا أفضل وهذا أحسن لازم تبدأ مشوارك وأنت مؤمن بنفسك ومؤمن أنه ((العلم بالتعلم)) مافيه شيء ينزل من السماء وتذكر دائمًا

“Practice Makes Perfect” 

خلونا نبدأ بخصوص فترة قبل تبدون الدوام، راح يكون عندكم ثلاث نقاط مهمة.

-:الأولى اختبار اللياقة المهنية

راح تجيكم رسائل بموعد الاختبار

طبعًا مافيه شي يخوف فحص بسيط عبارة عن دم ونظر وتحاليل روتينية واسئلة بسيطة مافيه اي شي يقلق وغالبًا محد ينرفض بسببه واذا صار فيه مشكلة راح يتواصلون معك.  الاختبار مايخوف ابدًا والنتائج تروح للجامعة مباشرة. *الحضور إجباري

-:الثانية اختبار تحديد المستوى للغة الانجليزية

اختبار مثل اختبارات قياس تظليل اذكر كان ١٠٠ سؤال، واسئلة متنوعة وبسيطة، لكن الاختبار يعتبر سهل وما اعتبره مقياس دقيق. ونتيجة الاختبار اذا طلعت بتعرفون بصير فيه رابط تشوف اي مستوى بتكون فيه..

راح يتم تقسيمكم الى ثلاث مستويات:-

١– مبتدأ ٢٠ ساعة

٢– متوسط ١٦ ساعة

٣– متقدم١٤ساعة

وبناءًا على مستواك تتحدد ساعات الانقلش.

*اللي عنده آيلتس “IELTS” وتكون درجته ٦ وفوق بشرط جميع المهارات ٦ يقدر ينزل مقرر اللغة الانجليزية

-:الثالثة أيام التهيئة وتسجيل المواد

على دفعتنا اللي هي ٢١٨ كانت قبل ماتبدأ الدراسة لمدة ٣ ايام، وكانت حلوه يعني يعطونكم معلومات عن الجامعة والانظمة ونظام الكليات بعد المسار مفيد.

طبعًا اخريوم فتحوا لنا تسجيل المواد، بتنزل جداول وتشوف اللي يناسبك، *بس بشرط لازم كل المواد نفس الشيء يعني اخترت الجدول رقم٥ لازم تختاركل المواد معها مايصلح تختارمثلامادة من٥ومادة من٦ وكذا* لكن لاتخافون راح يعلمونكم طريقة تسجيل المواد بالتهيئة

كذا نكون خلصنا فترة ماقبل الدراسة نجي الحين بداية الدراسة. وراح اقسمها بطريقة كل مادة لحالها

اشياء مهمة في السنة التحضيرية

:(BlackBoard)البلاكبورد

عبارة عن موقع راح تنزل فيه المحاضرات، وراح تكون عليه الكويزات الاون لاين والواجبات واللي يهمكم وهو الدرجات وغيرها كثير  يعني باختصار وسيلة ربط بين الطالب والجامعة

:(SIS)نظام سجلات الطلاب

هذا نقدر نقول انه زي برنامج الادارة يعني الامور الادارية والرسمية بتكون عليه مثل التعاريف والمعدل وتسجيل المواد واي شي يخص الدراسة بيكون عليها

:(Office hours)الساعات المكتبية

هذي عبارة عن ساعات يكون الدكتور موجود فيها بالمكتب، وتروح تكلمه عشان يشرح لك جزئية معينة او نقطة مافهمتها، وممكن الدكتور يشرح لك فيها افضل من المحاضرة؛ لان مافيه عدد ويقدر ياخذ راحته عشان عنده وقت وتقدر، وتقدر تروح لأي دكتور يعجبك يعني مهب شرط تروح لنفس دكتور فعاد استغلوها لان ممكن الدكتور يعطيك معلومات مهمة ونسى يذكرها بالمحاضره وهيك٠٠

وفيه مركز مصادر التعلم هذا نفس الساعات المكتبية لكن الدكتور ممكن يقولكم راح اشرح جزئية معينة احضروا نقدر نعتبره عام وممكن تلقى فيه مجموعة طلاب ٠٠

*اسئلة ممكن تواجهكم في السنة التحضيرية *

هل الدراسة صعبة؟ طبعا الجواب سهل وهو مافيه شي سهل ومافيه شي صعب انت واللي تبيه تشد حيلك تنجح وكثر ماتزيد راح تجيب درجات اعلى٠

هل راح انقطع عن اخوياي واهلي؟ هذا بيرجع لتنظيمك لحياتك الجامعة تختلف عن الثانوية فلازم تكون منظم ومرتب وضعك،، انا بالعكس صرت اطلع مع اخوياي اكثر من اول وهم بجامعات مختلفه، بالنهاية ترتيب الوقت هو اللي بيفوز٠

هل اللغة الانجليزية مهمة؟ اللغة ثم اللغة ثم اللغة بدون لغة ماراح تقدر تسوي شيء لازم تشتغل على نفسك وتشد حيلك وتذاكر كلمات لأن بتواجه كل شي باللغة الانجليزية٠

كيف الدوام؟ الدوام بيكون على حسب جدولك لكن بيكون من ٨إلى٥ لكن ممكن تطلع ٣ ويمكن تطلع ١٢ على حسب جدولك لكن راح تتعب لأنك ممكن بتطلع يوم المغرب فعادي لازم تتعود٠

هل فيه دكتور كويس؟ نظام الجامعة فيه روتيشن يعني الدكاترة تتغير كل فتره وكل مدة فيعني اذا حسيت دكتورك مش ولابد بيتغير بعد مدة بس هذا للمواد العلمية فقط٠

هل الاختبارات صعبة؟ ميزة الاختبارات بالجامعة ان اغلبها اختيارات وتصحيح آلي،، بعض المواد فيها أسئلة مقالية لكن حاطينها عشان تاخذ درجتها وتكون اسئلة مفتوحة فتقد تعبر وتاخذ راحتك

هل اذا نقصت درجاتي ماراح ادخل التخصص؟ هذا فكرة غلط ،،النقص شيء طبيعي لكن لازم تحافظ وفيه ميزه انه الجامعة ماتعتمد  النسبة حقتك بعتمدون القريد نفس اللي بالجدول فيعني الواحد مايخاف بخصوص الدرجات لكن اذا راحت ترى ماترجع٠

يمدي اذكر للاختبار بيوم؟ هذي ترجع للواحد لكن غالبا لا، لأن ممكن يكون المقرر كبير وتحتاج تقسمه عشان تفهم والميزة ان الاختبارات ماتكون الا يوم الثلاثاء من الساعه ١٠الى الساعة١٢ ثابت طول السنة للاختبارات الميد تيرم لكن ممكن يكون فيه كويزات بنفس الاسبوع وواجبات ٠٠

(:وش وضع الكتب الدراسية؟ اذا بدت الدراسة راح يعلمونكم بخصوص شراء الكتب واللي يحتاج الكتب يقدر يتواصل معي

ممكن تقولون حجم الكتاب كبير وش راح نسوي؟!! الكتب العلمية صحيح كبيرة بس ماراح تدرسونها كامل راح يتم تحديد جزئيات معينه معكم،،، بعض المواد ماراح تحتاج ترجع للكتاب كثير الا عشان تتدريب او تشوف لك تمارين٠

كل ماتريد معرفته عن السنة التحضيرية

مواد السنة التحضيرية

١)مواد سنوية

(English101,Biology,Physics and Chemistry)

بتكون تدرس المادة هذي طول السنة وماراح تاخذ قريد الا بنهاية الدراسة.

٢)مواد فصلية

بنذكرها بعد شوي وراح تاخذونها سمسترواحد وتطلع نتيجتها بنهاية الفصل بس هذي هي باختصار.

English 101

نبدأ بالمادة اللي لها النصيب الأكبر من المعدل ٧ ساعات،، فبتكون هي الفيصل بين الطلاب لأن تأثيرها بالمعدل كبير فاذا تضمن قريد عالي مثل A or A+ فأمورك بتكون زي اللوز.

المادة بتكون عبارة عن كتب بالترتيب كل مستوى بيبدأ من المستوى اللي يناسبه.

Advanced متقدم: Book 4 + 5

Intermediate متوسط:  Book 3 + 4 + وشوي من 5

Beginner مبتدأ: Book 2 + 3 + 4

نسولف عن المنهج باختصار ينقسم الى كتابين وهم Reading and Writing ~~~ Listening and Speaking

الكتاب يطورك ورهيب لكن كمية كلمات كثيرة،، فلازم تلحق نفسك خصوصا اذا كان مستواك مش ولابد!! الدكاتره ممتازين وكويسين من ناحية التعامل،، وراح يعرفونكم لانهم اكثر دكاتره بتقابلهم فضبط وضعك لان ممكن يساعد بامور ثانية تفيدك، يساعدونك واذا احتجتهم تقدر تطلبهم بدون اي مشاكل،، لكن ممكن فيه كم دكتور يشتكون منهم لكن انا ماواجهني احد سيئ 🙂

نتكلم عن شكل الاختبار بعدين الدرجات

الاختبارعبارة 5 مهارات بطريقة MCQS (اختيار من متعدد)

1-Speaking

2-Reading

3-Vocabulary and Grammar

4-Listening

5-Writing

الاختبارات مدتها ساعتين باستثناء اختبار Speaking يكون يوم لحاله او بنفس اليوم بس بوقت مختلف

نجي للمهم واللي هوالدرجات

• 10% Test1
• 10% Test2
• 10% Test3
• 50%Final Exam
• 5% E-Learning 
• 5% Writing Portfolios
• 10% الحضور و المشاركة

عندكم E-learning عبارة عن تمارين اون لاين منها على BlackBorad وفيه على Oxford learn  وراح يشرحونها لكم مع بداية الدراسة

وعندكم Writing Portfolios عبارة ِملف تحط فيه Essay زي مقال تكتبه.

نجي للمواد الحلوه واللي بتعجبكم واللي هي المواد العلمية أثناء السنة التحضيرية فيه نقطتين انه المادة تنقسم الى محاضرات ومعامل راح نبدا بأكبر مادة واللي هي

Biology احياء

بالنسبة لي كانت هذي افضل مادة وخصوصا انها بتفتح عقلك وتطورك… وتشدك لدرجة تخليك تضيع من التعمق وتسبح ببحر ماله نهاية  وهذا كله بسبب انك تتخصص بالتحفة اللي الله خلقها واوجدها اللي هو الانسان فبتدرس احياء يخص طبيعتك وخلقتك مش مثل الثانوي نباتات وحيوانات لا هذا فقط عن الانسان فتوصل لدرجة انك تشوف جسمك وتقول معقوله هذا وبيني وبينكم تحس انك فاهم الدنيا وعالم العلماء بس لاتتحمس هذا زي مايقولون بداية الغيث قطرة…..                                                                                         المادة زي ماقلت لكم نظامها سنوي ومافيها درجات تضيعها يعني تشد حيلك بتاخذها

• 15% Test1
• 25% Test2
• 15% Test3
• 25%Final Exam
• 15% Final Lab
• 5% BlackBoard

طبعا اللاب يكون اسبوع ايه واسبوع لا..  لكن كان شوي ممل لانه تكرار للي بالمحاضره مع مجسمات ومقاطع،، لكن اللاب مشكلته اختباره نهاية السنة ،، يعني من اول لاب بالسمستر الاول الى اخر لاب بالسمستر الثاني …. راح يدخل معكم بالاختبار                   دكاترة اللاب عسل راح يراجعون لكم ويساعدونكم اغلب الطلاب جابوا درجات حلوه يعني

..المادة سهله وصعبة بنفس الوقت،، تحتاج تراجعون بشكل مستمر،، و مع الوقت راح تتراكم المواد عليكم وراح تلقون صعوبة بالمذاكرة فلازم تنظمون وقتكم ،، عشان مايجي الاختبار وانتم ضايعين وماتدرون وين الله حاطكم!!!الاختبارات كانت بشكل عام سهله الى متوسطة   ماعدا الفاينل كان شوي صعب٠٠

A+لأن الكم كان كثير وضغط اخر السنة لكن بشكل عام تقدر تاخذ فيها

Physics  فيزياء

المادة هذي بتصدمكم شوي في السنة التحضيرية خصوصا اللي  كان يحبها بالثانوي لانها كانت اغث مادة والقسم ماكان ذاك الزود للاسف،،،،، يعني الطالب يعتمد على نفسه افضل له ، ويخلي مصدره الكتاب والمحاضرات، لان بعض الدكاتره كان مش دقيق بالمعلومة والمادة تعتبر من اصعب المواد، والدرجات تطير فيها لكن اذا شديت حيلك اضمن لك تجيب درجة ترضيك، لان درجاتها مقسمه على نقاط واجد فيميدكم تعوضون فيها…  لكن يعيب القسم انهم يشرحون شي وبالاختبار يجي شي ثاني وهنا الحل يكون بالالتزام بالكتاب ولازم تفهم  ماتحفظ!!!!!! فلازم تنتبه وتحافظ على درجاتك لان بالجامعة اي شي يروح مايرجع

اللاب حلو وفيه تجارب لكن التطبيق بيصير بنفس الوقت فيعني كل لاب تجربة جديده لكن درجات اللاب سهله وبسيطة

• 10% Test1
• 20% Test2
• 10% Test3
• 25% Final Exam
• 20% Lab
• 8% BlackBoard
• 7% assignments

Chemistry كيمياء

 أكثر قسم متعاون وشرحهم بطلللل، الاختبارات كانت سهله وبسيطة، الفصل الأول كان كيمياء عامة ،، ومواضيع بسيطة التفاعلات والتوزيع الالكتروني والجدول الدوري،، مثل الثانوي بالضبط،، لكن السمستر الثاني اختلف الوضع صار المنهج دسم وطويل لانه يتكلم عن هالكيمياء العضوية وبتاخذها بتفاعلات وتسميات وطريقة كتابتها لكن القسم مايعقد الامور.. لكن للامانة اختبار الفاينل كان صعب لانه كله كان رسم واشكال فتضيع وانت تشوف الورقة…. بس المادة كانت سهله والجميع جاب درجات عالية فيها

.اللاب كان ممتع بشكل رهيب،، لان فيه شغل وتسوي تجربة تحس نفسك عالم،، ومافيه اختبار فعلي لكن تسوي التجربة ويقيمك عليها طبعا اللاب اسبوع ورا اسبوع يعني خلال اسبوعين تاخذون لاب واحد وتقييم اللاب طول السنة ودرجاته مضمونة بالعربي

• 15% Test1
• 25% Test2
• 15% Test3
• 25%Final Exam
• 20% Lab

  …كذا نكون خلصنا المواد السنوية في السنة التحضيرية وهي اللي ماخذه اغلب المعدل وهي اللي راح تفرق بين الطلاب وتخصصاتهم

مافيه شي يجي فجأة!! هذي المواد تحتاج اجتهاد بسيط وماراح،، A+ نجي الحين للمواد الفصلية ونقدر نسميها مواد رفع المعدل يعني  تاخذ منك اي وقت اذا عرفت ترتبها بالطريقة اللي تناسبك

ESP and EAP (اللغة الانجليزية الاكاديمية والتخصصية)

المادة هذي ماعليك الا تحفظ الكلمات اللي فيها ومن اسمها واضح انها عن التخصص ففيه مصطلحات وكلمات بتساعدكم واصلا  بعض الكلمات بتصيرون اخذتوها بالمواد الثانية فبتكونون عارفينها من المواد الثانية طبعا المادة تنقسم الى جزئين وهم

EAPالأول وهو

واللي هي بتكون القرامر وبتاخذون فيها طرق للكتابه بالرايتنق بس الاختبار مافيه رايتنق

ESP الثاني وهو

وراح يكون فوكاب ماعليك الا تحفظ بس مافيه غير الكلمات

الدرجات تقسيمتها حلوه ومفيده للطلاب بحيث انه كل شي انت بيدك انت

• 10% Test1
• 10% Test2
• 40%Final Exam
• 5% E-Learning 
• 15% Writing Portfolios
• 10% presentation 
• 10% الحضور و المشاركة

Learning and Research Skills مهارات التعلم والبحث في السنة التحضيرية

مادة راح تعلمكم باختصارعن الاشخاص وطرق التعلم، وانواع الطلاب، وترتيب الوقت واشياء تساعد بحياتك الجامعية، ممكن المادة شوي ممله لانها نظرية، لكن مفيده فيها معلومات وفوائد للطالب، والحلو ان مافيها اختبارات عليها بس كويزات بسيطة وسهله وفيه مشروع جماعي وفيه مشروع فردي الدرجات ماتضيع منك الا اذا انت تبي تضيعها يعني مافيها احد ينزل فيها اصلا الا اللي بايعها زي مايقولون

• 20%quizzes
• 20% المشروع الجماعي
• 30%Final Exam
• 20% المشروع الفردي
• 10% الحضور و المشاركة

Communication Skills مهارات الاتصال

مادة سهله مثل مهارات التعلم والبحث، لكن تختلف واشوفها امتع لانها تطورك، من ناحيه القاء او استماع، وتعلمك كيف تستمع بشكل افضل وتستوعب المعلومات وغيرها من المهارات اللي تفيدكم بالتواصل مع الاخرين وكان لها مشروعين في السنة التحضيرية

   المادة بسيطة وماهي معقدة لكن فيها معلومات كثير بس الغالب مواد عامة CV الاول تسوي برزنتيشن والثاني تسوي

Computer Skills مهارات الحاسب

مادة سهله واغلبها عملي، لكن دفعتنا الغوا الباوربوينت والوورد، وصار بدالهم نظام المعلومات الصحية، كانت هذه الوحده نظرية وفيه معلومات، لكن العملي كان فيه برنامج الاكسل والاكسس، وكلها سهله وبسيطة، يعني تلقى شروحات باليوتيوب وغيره٠٠

Health and Physical Education التربية البدنية والصحية

اسهل مادة بالحياة ومادة تدرس بالعربي في السنة التحضيرية … بس العملي فيه شوي تعب للبعض،، طبعا منهج العيال، يختلف عن منهج البنات، لكن الجميع  يقول انه سهل وبسيط ،، بشكل عام المنهج رهيب المادة كلها عملي ومره ممتعه لان العملي راح تتعلمون الاسعافات الاولية وراح تتعلمون  CPR وشلون تسوون

ماعدا الفاينل فيه جزئ منه نظري لكن بالعربي وبسيييييطططط

 Faith and morals العقيدة والأخلاق

نقدر نسميها التوحيد مثل اللي بالمدرسة وكلها معلومات عامة مرت علينا بالدراسة قبل،، المادة طويلة وفيها كمية معلومات لكن سهله يعني ممكن تذاكر قبل الاختبار بفتره بسيطة وتجيب كامل بس ترجع لطريقتك واسلوبك،،  لكن فيه حفظ نصف جزء عمّ بس مافيه تسميع الاختبار تكمل الايات سهل وحاطينه عشان يعطونكم الدرجات في السنة التحضيرية

Social System in Islam
النظام الاجتماعي في الإسلام

هذي المادة ماتقدر تقول سهلة او صعبة،، لكن فيها معلومات وافكار غالبا درستوها مثل الزواج، والطلاق، والحدود وغيرها.. يعني ممكن قريبه للفقه،، لكن يعيبها فيه حفظ لمعلومات مثل: عدد او حكم او ماذا يترتيب،، وراح يختبرونكم بالنصف الثاني من جزء عمّ ومثل الاختبار اللي فات راح يكون اكمل

بس بالنهاية المادة سهل الواحد يجيب فيه درجة عالية وفيه بحث مطلوب تسونه راح يعلمونكم عنه والنقاط بوقتها

مواد الدين من اسهل مواد السنة التحضيرية وتدرس بالعربي والدكاتره متعاونين مع الطلاب وممكن لو نقص يساعده اهم شي عندهم انك تفهم*

لازم يعرف الواحد ان الدنيا ماهي دائما سعيدة او تضحك لك، فيه لحظات بتنهار او تتحطم،، وممكن تقول انا بالمكان الغلط،، أو تقول ودي انسحب لا تخلي الكلام هذا يؤثر عليك،، كل انسان تجيه لحظة انهيار يحس انه خلاص!! انتهت حياته أو الدنيا وقفت لكن هذا اكبر خطأ ان الواحد يستسلم!! صحيح السنة هذي ضغط نفسي كبيير،، وممكن يجيك افكار وش راح اسوي اذا ما انقبلت بالرغبة اللي انت تبيها .. لكن لازم تؤمن بأن الله لايضيع اجر العاملين مهما يعني بالنهاية الله بيقسم لك الخير يعني دائم الواحد يكرر الخيرة فيما اختاره الله٠٠

بالنسبة لي كانت السنة هذي ملحمية،، كأنك داخل حرب وتحسب حساب كل شي تسوي،، لكن بعد جد واجتهاد وشدت حيل،، الواحد يحصل، يعني صحيح الواحد تضايق وقتها ووصل لمرحلة وده يوقف.. ويقول خلاص لكن تشوف معدلك، وتشوف انك دخلت الكلية اللي تحلم انك تدخلها من زماان، وفوق هذا فرحة الناس اللي حولك٠٠ بالنسبة لي الحين اذا قالوا يادكتور السعادة اللي احس فيها تخلي الواحد مستعد يعيد الشيء هذا مليون مره لأنه الواحد لازم يصير شغوف وعاشق للشيء اللي يسويه،، والحمدلله هذا انا الآن قبلت في كلية الطب بجامعة الإمام عبدالرحمن بن فيصل٠

*التدوينة هذي تمثل شخصي ووجهة نظري فقط حول السنة التحضيرية … لا غير وممكن طريقتي ماتناسب الجميع بالنهاية الاختلاف طبيعة البشر لكن انا تكلمت من شيء انا مريت فيه،، ممكن شخص ثاني تختلف وجهة نظره او مفهومه لكن بالنهاية الهدف واحد وهو الفائدة*

بالنهاية اتمنى للجميع حياة سعيدة وممتعه وتذكر دائمًا