آخر تحديث:

بين الحقيقة والخيال … تجربتي مع السنة ثانية طب

السلام عليكم ورحمة الله وبركاته ..

أنا عبدالعزيز طالب طب اتممت سنة ثانية طب ، والآن أنقل لكم تجربتي المتواضعة ، بدايةً أتمنى لكم السعادة الدائمة، وأن تكونوا بخير وأفضل حال ، أبارك لكم اجتيازكم للسنة التحضيرية والحربِ النفسية، كانت سنةً طويلةً وانتهت بحلوها ومرها ، وجميع تجاربها ، وزادتكم خبرةً، تعرفتم على الحياة الجامعية، والاعتماد على النفس بشكل اكبر، فمحد يقولك ذاكر او ليش ما ذاكرت؟؟ كانت السنة عبارةً عنك أنت/ي وأنت/ي فقط … ومباركٌ لكم الإنجاز الأكبر وهو القبول بكلية الطبِ ، التي طالما كانت حلمًا لنا منذ الطفولة، لكن ماهذه إلّا بدايةُ المشوار، مشوارٌ من نوع أخر، مشوار طويلٌ لكنه ممتعٌ، وأنا أجزم بهذا ، المهم الآن أن نطوي ونختم تلك القصة بعد وصولنا للنهاية، فالآن انتهت قصةٌ وستبدأ قصةٌ جديدةٌ بقبولكم، فهذه أولى خطوات تحقيق الحلمِ، نعم!! الآن أنتم لأهدافِكم أقربُ …

راح أتكلم في هذه المقالة عن تجربتي بسنة ثانية طب (اول سنة تخصص) المقالة طويلة لكن حاولت اذكر كل شيء

راح ارتب الموضوع بالتسلسل التالي

  • دراسة الطب

  • نظام الكلية

  • طبيعة مقرر الطب

  • المواد و توزيع الدرجات وأشياء عامة

  • نصائح

  • تجربتي الشخصية

دراسة الطب

طبعًا دراسة الطب عبارة عن سبع سنوات تنقسم كالتالي

سنة تحضيرية (١) + خمس سنوات تخصص (٥) + سنة واحده امتياز (١)= مجموعهم سبع سنوات (٧)

  • تقسم السنوات الخمس بالتخصص، إلى جزئين الأول سنوات ما قبل سريرية Pre-Clinical years وراح تكون أول سنتين اللي هم سنة ثانية وثالثة ، وراح يكون تركيزهم على العلوم الأساسية Basic Science مثل التشريح Anatomy ، علم وظائف الأعضاء Physiology ، الكيمياء الحيوية Biochemistry ، هذي مجرد امثلة لكن فيه غيرها مواد كثير، وبتكون زي القواعد تبنونها للسنوات القادمة، فلازم تتقنونها لأن اذا صارت دراستكم لها مش حالك راح تتعبون، ومحد راح يدرّسكم من جديد، ولا احد بيعطيكم فرصة تراجعونهم، وممكن احد يسألكم عن معلومة، فحاولوا تشدون حيلك عشان ماتتفشلون وتنحرجون، وصحيح ممكن تدرسونهم مره ثانية لكن بيكون بمستوى أعمق.
  • بعدين نروح السنوات السريرية Clinical Years وراح تكون سنة رابعة، خامسة، وسادسة، وهذي راح نشرحها بوقتها ماودي اتفلسف عليكم من بدري.
  • سنة الامتياز بتكون تطبق لدراستك لمدة ١٢ شهر.

دراسة الطب خطوة بخطوة بعد التخرج من الثانوي وصولاً إلى استشاري

نظام الكلية

كلية الطب بجامعتنا جامعة الإمام عبدالرحمن بن فيصل، تتبع نظام جامعة موناش (Monash) الأسترالية، وجامعة موناش من الجامعات القوية بتدريس الطب، النظام اشوفه جدا قوي وممتاز، وفيه سلبيات لكن ماتقلل من قيمة النظام وقوته لكن هذا مو محور حديثنا الآن.

  • قبل ما اشرح مادة الطب بالتفصيل ، بسنة ثانية بيكون عندكم مادتين فصليتين ، كل وحده عليها ساعتين بالمعدل ، سهلين مثل التحضيري ، كل سمستر بتاخذون مادة وينزل لها قريد مستقل ، اللي بسنتا كان النظام السياسي والنظام اقتصادي بالاسلام. لكن طلع كلام انه بتتغير المقررات ويصير بدالهم مقررات ثانية ، لكن لاتضيعونهم وجيبوا فيهم A+ ، فسنة ثانية بتكون ٤٠+٢+٢= ٤٤ ساعة بالمعدل

بشرح لكم نظام مادة الطب، جامعتنا تختلف عن الجامعات الثانية، لانكم بتسجلون مادة وحده تحت مسمى “foundation of medicine I/MED201” الاسم راح يتغير كل سنة، بتكون عبارة عن مادة سنوية وعليها ٤٠ ساعة بالمعدل/ Annual Course with 40 Credit Hours وزنها بيكون جدا عالي بالمعدل، يعني النقص راح يؤثر عليكم ، ونظام المادة السنوية نفس الاحياء والفيزياء والكيمياء بالتحضيري يعني بتدرسونها طول السنة ، وبيكون عندكم ١٠٠ درجة بشرح تقسيمها بعدين .. الفكرة باختصار انكم راح تدرسون مواد كثير بس انها تحت اسم مادة كبيرة اللي هي Foundation of Medicine وعليها ١٠٠ درجة طول السنة.

  • بالإضافة فيه اختبارات بتكون نهاية سنة ثالثة ونهاية سنة خامسة
  • اسم الاختبار فايا (VIA) اختصار لـ Vertical Integrated Assessment ، الاختبار اختيار متعدد ، وعبارة عن نجاح ورسوب Pass/Fail ، مايؤثر على المعدل ، لكن لازم تنجح فيه عشان تنتقل للسنة اللي بعده ، والنجاح من 60.
  • بنهاية سنة ثالثة بيكون VIA I ويتضمن موضوعات السنة ثانية والثالثة
  • بنهاية سنة خامسة بيكون VIA II ويتضمن موضوعات من السنة الثانية إلى الخامسة
الخطة الدراسية كاملة

بشكل عام اقدر الدراسة تعتمد على ثلاث محاور أساسية

التعلم عن طريق حل المشكلات  PBL) Problem Based Learning)

المهارات السريرية Clinical Skills

الربط Integration

التعلم عن طريق حل المشكلات

  • طبعا هذا النظام يعتبر النظام الجديد بالتعليم، وصارت اغلب كليات الطب تتبعه كنظام تدريس، بحيث ان الطالب يعطى موضوع “مشكلة” ويبدأ يبحث ويدور عن المعلومات بنفسه، طبعا عندنا بالجامعة في كلاسات للـ PBL عبارة عن اربع ساعات أسبوعيا راح تاخذون موضوع وتتناقشون فيه، وبعدين بتقدمونه As a presentation وبيتم تقييمكم عليه ، بشرحه لكم بالتفصيل بعدين.

المهارات السريرية

  • مثل ماقلنا هذا من المحاور الرئيسية بنظام موناش وراح يكون عندكم بسنة ثانية، أربع زيارات للمستشفى ، مقسمة بالتساوي على الترمين، راح تتعلمون كيف تاخذون تاريخ مرضي History Taking وكيف تسوون فحوصات Examination ، بالإضافة بيكون فيه ساعتين أسبوعيًا توتوريالز مهارات سريرية، وممكن يكون فيه محاضرات ولابات تتعلمون فيها بعض الأشياء..

الربط

  • طبعا السؤال اللي دائمًا يسأل هل تدرسون بلوكات؟ والا كيف نظامكم؟
  • النظام اوصفه بـ Integrated Blocks يعني بلوكات بس متنكر شوي بتقولون كيف؟ طبعا اول ترم شوي مشتت وضايع مابتحسون بالترابط ولاشي، لكن راح يبين معكم بالترم الثاني، بس الفكرة انه كل شي تدرسونه ، بتاخذونه من أكثر من جهة مثلا بـ PBL و CS و اناتومي وفيسيولجي وغيرهم يعني بتغطونه من اكثر من جهة ودراستكم راح تكون By Systems يعني مثلا بتاخذون الجهاز الدوري “cardiovascular system” وتغطونه من جميع الجوانب وهذا مثال للتوضيح.

الدوام واللبس

اللبس:

  • للأولاد سكرب Scrub درجات الرمادي/الرصاصي، وباللاباتLabs بالطو Lab coat.
  • البنات يلبسون سكرب كحلي/ أو أي لون وفوقه لابكوت.

السكربز طبي وكل ماتريد معرفته عن السكربز

الدوام:

  • غالبا يكون من الساعة 8 إلى 3 بعض المرات نبدأ بعد 8 ، ومرات نطلع بدري قبل 3 يعني على حسب الجدول ، وممكن قعدنا بعد 3 مره او مرتين بس!! وراح يكون عندكم دائما بريك حق الصلاة والغداء الساعة 12 الى 1 نفس حق التحضيري
    Screen Shot 2019-05-27 at 19.50.23.png
    هذا مثال على الجدول  *خاص بدفعتنا*
  • الجدول مابيكون ثابت راح ينزلكم جدول كل اسبوع ، واذا كان جاهز بيعطونكم جدول السمستر كامل.

 

  • بس فيه اشياء ثابته وماراح تتغير طول السنة ، كلاسات PBL يوم الاحد من ١٠-١٢ و ١-٣ والكلنل سكلز يكون من ١٠-١٢ يوم الأربعاء.

طبيعة مقرر الطب سنة ثانية

بتكلم عن كورس الطب حق سنة ثانية اللي هو Med201 ، المنهج مقسم الى ركائز/Themes رئيسية وكل ركيزة تحتها مجموعة من الأهداف والمواد والمهارات، ومرتبة بطريقة انكم طول السنة تتنقلون بين هذي الركائز  يعني ممكن فترة التركيز على العلوم الاساسية، ومره يكون التركيز على المهارات السريرية ، فطول السنة بتشوفون اختلاف بالمواد وطبيعتها، يعني مابتقعدون تدرسون تشريح طول الوقت، لكن كل فترة التركيز بيكون على ثيم معين

  • هذي هي الركائز/الثيمات الاربعة + وش تتضمن تحتها
  • مثلا Theme III يهتم للأسس العلمية للممارسة السريرية ، فالمواد والمهارات بتكون علمية بحته وتشمل موضوعات مختلفة.
  • Theme I –Personal and Professional Development 
  • Theme I: Basic Law and Ethics, Health Enhancement
  • Theme II –Population, Society, health and Illness
  • Theme II: Health Knowledge & Society, Epidemiology
  • Theme III –The Scientific Basis of Clinical Practice
  • Theme III: Cell Biology, Pathological processes, Musculoskeletal, Peripheral nervous and Cardiovascular Systems, Human health and behavior, Pharmacology
  • Theme IV –Clinical Skills
  • Theme IV: Introduction to Communication and Clinical Skills

وهذا الشي بيكون بجميع السنوات لكن راح تختلف المواد والاهداف والمهارات المطلوبة وطريقتها.

المواد


Biochemistry

Anatomy

Physiology

Microbiology, Immunology, and Parasitology

Pharmacology

Pathology

Medicine of the Mind (MoM)

Health Enhancement Program (HEP)

Health Knowledge and Society HK&S

Population Health

Medical Law and Ethics

Radiology

Clinical Skills (CS)

Problem Based Learning (PBL)


الكيمياء الحيوية Biochemistry

  • مادة حلوة بس بعض المرات مملة، طبعا كان لها نصيب الاسد بالترم الاول، وكانت كميتها كبيرة جدًا، يعني ممكن تاخذون ٥ محاضرات بأسبوع واحد ، بالسمستر الثاني كان فيه محاضرتين فقط ، ويوم سألنا الدكتور قال هذي المفروض تكون معكم السمستر الاول بس أنه تم تأجيلها .
  • بتدرسون المركبات الحيوية مثل الكربوهيدرات والدهون والبروتين ،
  • بتدرسون كيف الخلية تنتج طاقة، يعني اذا تذكرون التحلل السكري وحلقة كربس ووسلسلة نقل الالكترون، والايض، الانزيمات ،
  • وبتدرسون الوراثة وقوانين مندل، وبتتكلمون عن الجينات و DNA & RNA والطفرات اللي تصير ، وكيف يصير انقسام الخلايا وتضاعف المادة الوراثية ، وفيه جزئية عن كيفية تكوّن الخلايا السرطانية، واخر شي بتاخذون محاضرات عن الدم وبعض الامراض ..
  • طبعا المادة تحتاج مذاكرة بشكل مستمر، لأن كميتها كبيرة وممكن تتعبون شوي ، بس حاولوا تلخصون وتسجلون نوتس مع الدكاترة، وعندكم اليوتيوب مليان شروحات بس اكتبوا العنوان اللي تبونه وشوفوا

التشريح Anatomy

IMG_7925.jpg

  • هذي المادة ممتعة وممكن تشوفون اللي تدرسونه عليكم ، المادة مقسمة إلى أربع أجزاء
  • Embryology علم الاجنة وهذا عبارة دراسة تكون الجنين وتشكل اعضائه وتطورها، و أي شي الى  ولادته.
  • Gross anatomy التشريح العياني وهذا بيكون عبارة عن دراسة الاجزاء الكبيرة بالجسم واللي نقدر نشوفها بدون مايكروسكوب.
  • التشريح العصبي Neuroanatomy وهذا بتدرسون تشريح الاعصاب وتنظيمها.
  • علم الانسجة Histology وهذي بتدروسون الخلية وكيف تتكون وانواعها اي شي له علاقة بالانسجة.
  • هذا بشكل عام تقسيم منهج الاناتومي، و اكيد انكم ماراح تبدون تدرسون جسم الانسان بتعمق!!
  • راح تبدون من أصغر شي وهو الخلية ومكوناتها، بتدرسون كيف يتكون الجنين وهذي العمليات، بتاخذون أنواع الانسجة، بعدين تنتقلون شوي إلى جزئيات أكبر مثل مبادىء وتكون العظام، المفاصل، العضلات، الأعصاب، الجلد، وجزئية عن الجهاز العصبي، وراح تختمون السمستر الاول بالاوعية الدموية و الجهاز اللمفاوي … طبعا السمستر الاول مافيه لابات للاسف.
  • السمستر الثاني المادة بتختلف وراح تكون المعلومات بشكل مكثف ومضغوط، وممكن تحتاجون الكتاب وانا انصح انكم تاخذونه ، اللي طلبوه مننا هو Clinical Anatomy by Systems او مثل ماهو متعارف عليه سنل Snell ، بتكون جدا ممتعة وتنبسطون وبتحسون انفسكم علماء، بتدرسون بشكل عام موضوعين واللي هم
  • الجهاز العضلي الهيكلي Musculoskeletal System MSK وهنا بتدرسون الطرفين العلوي والسفلي، الظهر والعمود الفقري، وبتاخذون العضلات، والعظام، والاوعية الدموية، والأعصاب، وكل شي متعلق فيهم.
  • الجهاز الدوري Cardiovasuclar System CVS هنا بتاخذون القلب والاوعية الدموية، وتكوين القلب ومكانه واي شي له علاقة بهالموضوع.
  • طبعا السمستر الثاني بيكون عندكم لابات يومي الاثنين والاربعاء، وراح تتقسمون إلى مجموعات وراح يشرحون لكم النظام كيف بيكون، لكن اللابات تنقسم ألى أربع أنواع
  • Dissection تدخلون المشرحة، وتشرحون جثث وتكتشفون اللي تدرسونه بالمحاضرات، وترى مايخوف ولاشي ، وبتتعلمون اكثر كل مره تدخلون للمشرحة .
  • Prosection يشرح لكم الدكتور على اعضاء مشرحه وجاهزه، طبعا الفايدة من هذا بالنسبة لي اكثر بكثير، لان الاعضاء مشرحه بطريقة ممتازة واحترافية والدكتور بيقعد يشرح لكم عليها.
  • Imaging هذا اللاب بتاخذون صور اشعة مختلفه للعظام او عضو معين، وبتشوفون صور لانواع اشعة مختلفة مثل Xray , CT and MRI بس شوي يطفش .
  • Tutorials بتكون عبارة عن موضوع مرتبط بالمحاضرات وعليه مجموعة اسئلة، او تكملون الرسم ويعتبر من الأشياء المهمة لان تجي عليه اسئلة بالاختبار .

علم وظائف الأعضاء Physiology

هذي المادة لطيفة وخفيفة وسهله، راح تدرسون كيف العمليات تصير داخل الجسم وكيف هذا العضو يسوي الشي الفلاني، وكيف الخلية تشتغل وغيرها الكثير

  • السمستر الاول محاضراتها قليلة، بتاخذون الخلايا وكيف تسوي اتزان الماء بالجسم، الحمض والقاعدة، وهذا كان للمد بس فكانت مرره بسيطة، لكن بعد المد بتاخذون جزئية عن Action Potential جهد العمل وتراه سهل لكن لااااااازم تفهمونه كويس لأنه مهم وراح يستمر معكم لنهاية السمستر واصلا يفيدكم بعدين وبهذا يكون السمستر الاول خلص.
  • السمستر الثاني بدأ بالجهاز العصبي الحسي + الحركي وكيفية الاحساس والالم والحراره وأنواع المستقبلات، وكيف ردة الفعل تصير، كان ممتع بس السلايدات مرره متعبة لكن إن شاء الله يعطونكم سلايدات احسن .
  • بعدين اخذنا العضلات، وكيف تشتغل العضلة، وكيف تنتج طاقة، وكيف تنقبض وكم حاجة حلوه.
  • أخر شي واللي كانت أكثر جزئية ممتعة واللي هي الجهاز الدوري ، بتدرسون طريقة عمل القلب وكيف ينقل الدم ، ووش اللي يتحكم فيه، والشرايين والاوردة، وكيف الدم يتوزع بالجسم، مع هذي الجزئية فعلا تستشعرون عظمة خلق الله لنا سبحانه بابداع..   “وَفِي أَنفُسِكُمْ ۚ أَفَلَا تُبْصِرُونَ”

علم الاحياء الدقيقة ، علم المناعة ، وعلم الطفيليات Microbiology, Immunology and Parasitolog

IMG_8489.jpg

هذي المادة مقسمه الى ثلاثة جزئيات

  • السمستر الاول بتدرسون الاميون وراح تتكلمون عن جهاز المناعة والخلايا المناعية وكيف تتكون وكيف تدافع عن الجسم وبعض الامراض المناعية.
  • بالمايكرو بتاخذون البكتيريا والفيروسات والفطريات و أنواعها وكيف تتسمى، ومثلا الطرق اللي نشوفهم فيها يعني مرره بسيط وتعتبر زي مقدمة لكم وبهذا انتهى السمستر الاول.
  • السمستر الثاني راح تكملون على المايكرو و كيف الفيروسات والبكتيريا تسبب المرض، والطرق اللي تستخدمها ، وبتدرسون امثله كثيييرة على هذي الأشياء ، وبتاخذون العدوى الفيروسية و البكتيرية اللي تصيب الجلد والجهاز العضلي الهيكلي.
  • نصف السمستر الثاني راح تاخذون البارا وراح تدرسون الطفيليات مثل الديدان والامراض اللي تسببها وعندكم امراض يسببها الباعوض وبعض الحشرات مثلا، والمادة كانت حلوه بس قلق لان فيها اسماء كثييييير، بس حاولوا تسوون تلخيص لانفسكم بحيث ترجعون له بشكل سريع ودايم، لكن ترى المادة ممتعة وفيها ضحك لانكم بتخافون وتكرهون كل شي.

علم الأدوية Pharmacology

  • هذي المادة تتكلم عن الأدوية وطريقة عملها، وايش ممكن تسبب، واستخداماتها، طبعا المادة تعتمد على الحفظ وفيها أدوية كثيرة بس راح تبدون حبة حبة، راح تدرسون كيفية امتصاص الأدوية، وكيف تتوزع، وبعدين راح تدرسون السموم مثل سم الحية والعقرب، بعدين النواقل العصبية والأدوية اللي ممكن نستخدمها، وبتاخذون الأدوية اللي تستخدم في علاج السرطان، وأخر شيء مضادات الفطريات وبكذا السمستر الاول انتهى، لكن صراحة ثقيل وممل.
  • السمستر الثاني بالنسبة لي امتع بكثثثثثثير تاخذون مسكنات الالم بانواعها، والمضادات الحيوية والفيروسية، الأدوية اللي تشتغل على الجهاز العصبي، وبتاخذون جزئية بسيطة عن التخدير، وبعض الادوية حقت الضغط والدهون وامثلة على بعض الامراض وعلاجاتها كانت حلوه وأسهل بكثيير من السمستر الاول..
  • طبعا لاتسمعون كلام الناس انها صعبة وماتنفهم، كل شي بيكون صعب اذا ماتذاكرون، بس اهم شي وهذي نصيحة بتفيدكم سجلوا أسماء الأدوية واكتبوها بخط يدكم عشان تثبت أكثر.

علم الأمراض Pathology

  • هذي المادة الظاهر بس كان عليها ٨ أو ٩ محاضرات طول السنة، مافيها شي واجد بس أسئلتهم بالاختبار تجي على شكل قصص، يعني يحتاج تركزون وتفهمون كويس، بتدرسون كيف تتعامل الخلية إذا صار فيه اصابة أو جسم غريب ، وتعامل الجسم مع هذي الأشياء، والإلتهابات وأنواعها وموت الخلية المبرمج.
  •   السمستر الثاني كان اونس وكان مرتبط بالجهاز الدوري ومشاكل الدم، وإذا صارت جلطة أو ماتت خلايا القلب.

MoM & HEP

  • MOM اختصار لـ Medicine of the Mind ، من أمتع المواد من ناحية المواضيع لأن لها علاقة بعلم النفس Psychology ، راح تدرسون نظريات عن التعلم والتفكير والسلوك ، وبعدين بتاخذون عن الأمراض النفسية والعصبية وعلاماتها ممتعة مرره لكن كل هذا بيكون بشكل مختصر وبسيط

 

  • HEP هذي اختصار لـ Health Enhancement Program يعني كيف تحسن الصحة وكيف الواحد ،  يتعامل مع الضغوطات كطبيب، وغيرها مثل، البيئة و التغذية والرياضة وأي شي له علاقة بالصحة وتراها سهله بعد.

HK&S and Population health

  • Health Knowledge and society هذي مادة معنية بالمجتمع والصحة ، بشكل عام راح تتكلمون عن النظام الصحي بالمملكة وكيف قاعد يتغير ، التثقيف الصحي ، فيه جزئية عن الحج وأنواع التوعية هذي الموضوعات بشكل بسيط فالمادة تعطيكم ثقافة صحية.

 

  • Population health راح تاخذونها بالسمستر الثاني بس ، وهي عباره عن ١٤ محاضرة + ١٠ توتوريالز ساعتين لكل توتوريال.
  • راح تدرسون فيها مفهوم صحة السكان ، علم الأوبئة ، الاحصاء الحيوي ، الدراسات البحثية وأنواعها ، وكيف تقرأ نتائج الدراسات .
  • كانت طويلة ومملة ، والطلاب اهملوها و جاء عليها بالاختبار اسئلة كثير + تعبتر مهمة بالحياة العملية لأن راح تساعدكم بطريقة عمل الابحاث.
  • والدكتور قال الكورس هذا ماراح يتكرر السنوات الجاية فهذي فرصتكم لاتفوتونها.

 القانون الطبي Medical Law

هذي المادة من اسمها تتكلم عن القانون واخلاقيات الطب، والمادة حلوه ، وماعليها محاضرات واجد، وفكرتها مثلا بيعطيكم موقف صار، ويقولكم وش الشي الصح او المفروض يصير


علم الأشعة Radiology

مادة بسيطة مافيها شي فعليًا، بتاخذون أنواع الأشعة وأسماؤهم واستخدماتهم وكم معلومة عنهم، مرره بسيطة واصلًا عليها محاضرتين تقريبا وكانت بالسمستر الثاني فقط


المهارات السريرية “Clinical Skills “CS

  • طبعا هذي عبارة عن أشياء متنوعة ، ممكن يكون عندكم محاضرات وممكن عملي ، لكن بشكل دايم راح يكون عندكم توتوريالز اسبوعي ، يوم الاربعاء من الساعة ١٠-١٢ وبتاخذون كل اسبوع موضوع … طبعا يختلف التوتوريالز عن المحاضرات، بحيث انه راح يتم تقسييم الدفعة لقروبات ثابتة طول السنة ، عدد القروبات عشره يعني ممكن كل قروب ١٢-١٣ طالب/ـة كذا ، وكل اسبوع بتجتمعون ويجي دكتور يناقشكم ويشرح لكم، طبعا لازم تعتمدون على انفسكم بعض المرات، بس راح تبدون من أول خطوة وهي كيف تتواصل مع المريض ، وكيف تتعاملون معاه ، وبيعلمونكم كيف تاخذون History او تاريخ مرضي ، وبيكون تركيزكم على التاريخ المرضي طول السمستر الأول ، ونصيحة حاولوا تتقنونه وتبدعون فيه من بدري لأنه شي بيمشي معكم مدى الحياة!!
  • السمستر الثاني راح تبدون تاخذون تاريخ مرضي بشكل ادق واكثر تخصص لأشياء معينة، وزي ماقلنا انتم بتاخذون MSK &  CVS فبتكنون طول السمستر تتعلمون عليهم وكيف تسوون Examination او فحص وترى لازززم تتدربون بشكل مستمر عشان اختبار الاوسكي نهاية السنة ….
  • وبخصوص المحاضرات راح تكون لها علاقة باللي تدرسونه والعملي، بيكون عندكم عن الطريقة الصحيحة لغسل اليدين الصحيحة، وكيف تاخذ علامات حيوية الضغط والحرارة وكيف تعطي ابره وبيعملونكم عن الـ ECG تخطيط القلب ، وترى بتنبسطون عليهم

جزئية الزيارات ، بيكون عندكم زيارتين بالسمتسر الاول ، وحده بتكون لمستشفى الملك فهد الجامعي، والثانية مركز طب الأسرة اللي موجود بالحرم الجامعي ، وراح تاخذون تاريخ مرضي بس ، السمستر الثاني عندكم زيارتين بعد ، لكن المره هذي بتاخذون تاريخ مرضي + فحص وممممره ممتع وراح تتعاملون مع مرضى وبيدعون لكم وتحسون أنفسكم دكاتره من جد 🙂


PBL

  • زي ماقلنا انه راح يتم تقسيم الدفعة إلى ١٠ قروبات وهذي القروبات بتكون نفسها حق PBL & CS
  • البي بي ال من امتع الاشياء وراح تطور منكم بشكل كبيير، يعني راح تاخذون موضوع ويعطونكم قصة عليه، وراح تناقشون القصة هذي مع بعض وبتطلعون بأهداف، وهذي الأهداف تناقشونها الأسبوع اللي بعده ببرزنتيشن، فبتتطور مهاراتكم بالتواصل والتخطيط، مهارات الالقاء وإعداد العروض وتقسيم العمل، وكثير مهارات ، طبعا بيكون عليها تقييم 4 درجات لكل سمستر فالمجموع 8 طول السنة والدكاتره بيقيمونكم ولهم طريقة يعني حاولوا تشاركون وتتفاعلون مع الدكاتره ، طبعا للتوضيح الدكتور/ه دورهم قليل يعني كل شي عليكم أنتم ، هم راح يساعدونكم إذا ابعدتوا عن الموضوع أو بديتوا تخبصون ، بيساعدونكم ويصححون لكم معلومات ، لكن لاتتوقعون منهم يعطونكم كل شي ، الفكره أنه أنتم تشتغلون وتبحثون وبيكون هالشي منكم واليكم.

الكتب

2016-09-02 17.18.01.jpg

بالنسبة للكتب جميعها متوفرة Pdf كنسخة الكترونية ، واللي حاب يشتريهم هذي القائمة فيها الكتب ، طبعا بالسلايدات راح يقولون لكم المرجع المطلوب ، بالإضافة لكتب اذا تبون زيادة معلومات فقط .

الكتاب اللي انصح فيها واشوفها مهمة

  • Clinical Anatomy by Systems للاناتومي
  • Sherwood Human Physiology 8th edition للفسيولوجي

الباقي تقدرون تاخذونه من المكتبة او تستخدمون النسخة الكترونية  ، وترى الكتب بعضها غالي فلا تتشرونهم على طول يعني استخدموا النسخة الالكترونية او استعيروها ، واذا اعجبتكم اشتروها.

كتب طبية، ملخصات طبية ومواقع طبية لكل طالب طب

 


الدرجات

مثل ماقلت لكم عندنا ١٠٠ درجة فقط ، وتقسيمهم كالتالي

  • Seminar 3marks : راح يعطونكم مواضيع + المادة العلمية اللي تستخدمونها ، وراح تسوون برزنتيشن تقريبا مدته ٥ دقائق + دقيقتين نقاش، وبيطلبون منكم ورقة توزعونها كملخص للموضوع حقكم والتقديم بيكون قدام الدكاترة والطلاب ، عشان كذا لازم تشدون حيلكم بالـ PBL عشان تبدوعون، لأن عليه درجات سهله بس تحتاج شغل .
  • PBL 8marks : شرحناها وتراها بسيطة بس حاولوا تضبطون وضعكم وتشاركون كويس ، وترى كل سمستر تقييم لحاله والدكتور بيتغير .
  • Professionalism 1mark : هذا ماطلبوه مننا، بس سألت وقالوا انه عبارة اسئلة عن الاخلاقيات الطبية وبسيط جدًا .
  • Medical Terminology 1mark: واجب بداية السنة عن المصطلحات الطبية، ومره بسيط يعني يعطيك كلمة وتكتب تعريف ، او خيارات .
  • Case Commentary 5marks : هذا المشروع بيكون السمستر الاول ، ويحتاج تشتغلون عليه وتنظمون وقتكم ، بسنتنا صار التسليم السمستر الثاني ، فالجميع اشتغل عليه بالاجازة اللي بين السمسترين ، على العموم هو عبارة عن عمل فردي، وراح تكتبون موضوع كامل عن عنوان معين ، طبعا هذا العنوان بيكون مرتبط بزيارة المستشفى ، لان قلنا راح يكون عندكم زيارتين بالسمستر الاول وبتاخذون تاريخ مرضي ، وبيجيكم المريض بحالة معينة ، فعاد مطلوب منكم تكتبون زي التقرير،  وراح يشرحون لكم تفصيله كاامل ووش المطلوب منكم ، لكن اهم شي اذا رحتوا المستشفى تاخذون تاريخ مرضي كامل ، وحالة كويسه تقدرون تكتبون عليها لان المطلوب منكم ٢٥٠٠ كلمة مع هامش زيادة او نقص ١٠٪ ، ملحوظة لحد يتحمس ويحاول يكتب كلمات بدون فايدة عشان يكمل العدد اكتبوا صح وبتشوفون أنفسكم وصلتوا للعدد المطلوب بدون كلمات غير مهمة.
  • Popular information 6marks : هذا بيكون هو مشروع السمستر الثاني، اذكر كان الشغل مدته اقل من شهر وعطونا اياه بنص السمستر، فلااازم تهتمون وتركزون عليه لان عليه ٦ درجات مو شوي ، بيكون عمل جماعي نفس قروباتكم PBL بتشتغلون عليه كمجموعة ، بيعطونكم موضوع علمي وموضع من جريدة مثلا و مطلوب منكم اسئلة تجاوبون عليها … وترى هذا له علاقة بمادة Population health سهل بس اهم شي لحد يقصر ويسلك فيه لان التقييم بيكون للمجموعة كاملة فممكن تتقصون زملائكم

Exams

  • الاختبارات بالجامعة تنقسم الى ثلاث انواع MCQ اختيار من متعدد سؤال وعليه اربع خيارات ، EMQ اسئلة توصيل يكون ممكن سؤال سؤالين او اكثر وفيه مجموعة خيارات وانت تختار الجواب المناسب ومسموح لك تستخدم الجواب اكثر من مره او ماتستخدمه طبعا ماراح يكون توصيل بالقلم ، SAQ اجابات قصيرة/مقالي ..

  • مدة الاختبار دائمًا ثلاث ساعات تكون من ٩ إلى ١٢ عدد الأسئلة ١٢٠ سؤال لكل من MCQ & EMQ اما SAQ شوي مختلف تقريبا بيكون ٦٠ سؤال يزيد او ينقص على حسب لكن عليهم ١٠٠ درجة يعني بيجي سؤال عليه ٥ درجات او سؤال عليه ١.٥
  • طبعا كل المواد راح تكون بنفس الاختبار بس لاتشيلون هم لان بيكون عبارة عن اقسام كل مادة لحال
  • طبعا راح ينزلكم بلوبرنت فيه المطلوب منكم بالاختبار وكم سؤال للمادة الفلانية
    Screen Shot 2019-05-27 at 19.54.05.png
    هذا مثال على البلوبرنت، وفيه بلوبرنت تفصيلي بيذكرون لكم المحاضرة وكم سؤال عليها  *هذا خاص بدفعتنا*

السمستر الأول 

  • اول اختبار بيكون MCQ بس وراح يكون عليه 6 درجات واذكر كان شامل اول 6 weeks
  • نهاية السمستر الاول بتختبرون ثلاث اختبارات MCQ, EMQ and SAQ وتوزيع الدرجات بيكون كذا 7.5MCQ+7.5EMQ+5SAQ =20 marks

السمستر الثاني

  • المد راح يكون اختبارين وهم 5MCQ+5EMQ=10marks
  • الفاااااينل نهاية السنة ، بيكون شامل جزئية من السمستر الاول وجزئية من المد حق السمستر الثاني والجزئية اللي باقي ما اختبرتوا عليها وراح يحددون لكم المطلوب معكم لاتخافون مو كل شي بيكون معكم ، راح يكون ثلاث اختبارات 7.5MCQ+7.5EMQ+5SAQ=20marks

OSCE

  •  اختبار المهارات السريرية او مثل ماهو معروف OSCE هي اختصار لــ Objective Structured Clinical Examination الفكرة انه راح يختبرونك على اللي درسته بالكلنكل سكلز CS ، اختبار عملي نهاية السنة وراح يتم تقييمكم من دكتور ، محد بيقولك صح او خطأ يعني تشتغل وتسوي اللي عليك، بشرح لكم باختصار راح يكون فيه محطات/ stations وراح يكون فيه case تقرأه قبل ماتدخل وفيها المطلوب منك، مثلا تاخذ تاريخ مرضي او تسوي فحص .. طبعا لازم تكونون مذاكرين ومتدربين كويس ، لان مافيه اعادة واذا ضاع شي محد بيعوضك عليه ، الوقت وهذي الامور تنشرح لكم بعدين .. فلازم تكونون داخلين مستعدين عشانه ، وبيسون لكم اختبار تجريبي بدون درجات عشان يدخلونكم الجو وراح يفيدكم ويعلمكم كيف بيكون الوضع .
  • بداية السنة قالوا لنا انه الاوسكي عليه ٢٠ درجة وبعدين بالسمستر الثاني قالوا لا عليه ١٦ درجة و ٤ درجات على حضور الكلنكل سكلز CS .
  • انصحكم بهذا الموقع ولهم قناة باليوتيوب فعليا كان افضل صديق ومساعد للاوسكي Geeky Medics 
  • وعندكم هذي القناة باليوتيوب مقاطعهم سهله ومختصرة لطريقة عمل بعض  الفحوصات Physiotutors 

 

  • نقطة اخيرة بخصوص الدرجات ، طالع كلام على انه ممكن تتغير وانهم بيزيدون عدد الاختبارات واتمنى يتطبق يعني ممكن يصير فيه تغير على هذا الموضوع . 

مواقع وقنوات مفيدة

Armando Hasudungan

Bozeman

Osmosis

khanacademy

dr Najeeb lectures

Dhshan Hassan Dhshan for pharmacology

الدكتور خالد فسيولوجي

هذي بعض القنوات ممكن تفيدكم اضغطوا الاسم وبينقلكم له على طول ، وترى فيه كثير، بس ابحثوا عن الموضوع وراح تلقون كثير . 

  • قناة الدكتور نجيب تحتاج اشتراك لكن مره مفيدة وشرح اسطوري .

 

وش ممكن نحتاج؟

  1. اهم شي وأول شي بالنسبة لي كان جهاز تابلت ، ما انصح انكم تطبعون سلايدات بتتعبون وبيضيعون، الكمية أضعاف التحضيري بلا مبالغة ، انا استخدمت iPad 6th gen وسعره ممتاز أقل سعة تخزينية ممكن تحصلونها ب١١٠٠ + قلم ابل + برنامج للكتابة وفيه كذا برنامج وفيه حركة أنه مجموعة تسوون لكم حساب وتشترون البرامج وتتشاركون فيهت عندكم البرنامجين هذي استخدمتهم  pdf expert + notability وكلهم ممتازين بيعطونك حرية تسجل المحاضرات، وتكتب نوتس وتضيف وتعدل واشياء كويسة ، اللاب توب ما اشوفه عملي الا اذا فيه خاصية اللمس او يدعم الكتابة عشان يعطيك حرية تكتب على السلايدات.
  2. لاتتحمسون وتشترون كل الكتاب لانها غالية وتكلف ، وكثير طلاب ما استخدموا الكتب ، لكن انا انصح انكم تشترون كتاب الاناتومي، وراح تستفيدون منه بالسمستر الثاني وتراه اختياري فيه طلاب ما استخدموا ولا كتاب طول السنة ، وحرفيًا السمستر الاول ما استخدمت شي الا قلللليل واذا احتجت الكتاب اخذته من المكتبة .
  3. اشتروا سكرب وحاولوا تاخذون نوعيات كويسه لان بتعيشون طول اليوم فيه والاسعار تتفاوت فيه جاهز وفيه تفصيل وفيه براندات ممتازه بس غالية وفيه اشياء متوسطة وسعرها معقول ..
  4. من الاشياء اللي تحتاجونها تطورون أنفسكم ، بحيث تتعودون تذاكرون أوقات أطول، وبطريقة أفضل لان راح تحتاجون تبحرون خارج السلايدات، وبتحتاجون تشوفون مقاطع وشروحات و ترجعون للكتب بعض المرات ، فحاولوا انكم تتعودون على هذا الشي من بدري عشان بعدين يصير عادة لكم ويختصر عليكم وقت

نصائح

  • جدد نيتك وتوكل على الله ، ثم اطلب التوفيق من الله والدعاء من الماما والبابا 💛
  • الطب تكليف وليس تشريف ، يعني لحد يغتر ويشوف نفسه ، بالعكس الان عليك مسوؤلية كبيرة ، وراح يكون بين يدك حياة أشخاص ، فلازم تكون قد هذي الأمانة وتجاهد نفسك..
  • ذاكروا ، ذاكروا ، ذاكروا ، ذاكروا وإلى أخر يوم أقولكم ذاكروا .. الطب مو صعب ولا سهل ولكن بين ذلك سبيلَ ، المفتاح والحل كله بالإستمرارية مو الشطارة والدفارة بس ، إذا تذاكر كويس تجيب كويس ، بس تذكر مو دائمًا أنت البطل!!
  • درجاتك ماتمثل من تكون ، أنت ممتاز مهما كانت الظروف ، لكن إذا سقطت لا تقعد!! ارجع وحاول من جديد!!
  • الكلية وحياتك بالطب ليست وردية ، يوم لك ويوم عليك ، لكن اصبر وحاول مرة ومرتين وثلاث مرات وحتى لو تطلب الموضوع مليون مرة .. مو شرط شغلك الممتاز يعطيك درجة كاملة ، ممكن تشوفون ناس شغلهم أقل منكم بس اخذوا درجة أعلى ، بالنهاية هذا توفيق ورزق من رب العالمين ، فلا تحسدونهم أو تتضايقون ، ولايكون هذا سبب أنكم تضعفون أو يحبطكم ، وتذكروا أن الله لايضيع أجر العاملين ، وبالنهاية مايصح إلّا الصحيح .
  • دراستك مهمة ونفسيتك أهم ، إذا بتقدم دراستك على صحتك ونفسيتك دائمًا ، ترى مابتفوز ولابتحصل نتيجة ، وممكن تضر نفسك أكثر ،  لذا حاول توازن.
  • ذاكروا ، ذاكروا ، ذاكروا ..
  • حاولوا تستخدمون الورقة والقلم ، وتلخصون المواد بشكل مستمر ، وتصير مرجع لكم بحيث اذا بتراجعون للمحاضرة يكون عندكم ورقة صغيرة ومختصرة وفيها كل شي ، تختصر وقت، وتثبت المعلومات. 
  • سالفة بتدخلون الاختبار مذاكرين ١٠٠٪؜ كل شي نادرة لأن المنهج كبير ومابيكون عندكم القدرة تتقنون كل شي ١٠٠٪ لكن ٩٠٪ أو ٩٥٪ ممتازة وممكن الـ١٠٪ مايجي منها، لكن حاولوا تغطون كل شي تقدرون عليه ..
  • خلوا لكم من فترة لفترة عادة، مثلًا تطلعون كمكافأة لأنفسكم، من باب تغيرون جو لأنكم بتملون بعض المرات..
  • تحتاجون يكون لكم مجموعة تساعدكم ، واذا فيه شي صعب تشروحونه لبعض ، يعني لاتنعزلون وتصيرون لحالكم بالعكس خلوكم اجتماعيين ومتعاونين.
  • تعرفوا على اللي اكبر منكم ، ترى بيساعدونكم واجد، ويعلمونكم أشياء صارت لهم ويقولون لكم أشياء تتجنبونها، خصوصا إنهم سبقوكم بهالشي.
  • كل إنسان له تجربة فحاول تعيش تجربتك الخاصة ، اسمع من غيرك واستفد منهم ، لكن لا تاخذ السيئ منهم  ، يعني هذي حياتك وتجربتك الشخصية فحاول تعيش كل شي فيها واستمتع.
  • حط احتمال للأسوأ ولاترفع سقف توقعاتك مهما حصل عشان تحافظون على نفسيتك ، لأن ممكن يجي شيء ويكسرك..
  • لاتصدقون الكيرف اب Curve-Up ولا تتأملون فيه ، اذا عطوكم الحمدلله ، واذا ماعطوكم مافرق شيء ، ولاتبنون طموحاتكم عليه ، لأن ممكن يقولون بنعطيكم ومايعطونكم وفعلًا حصلت!!

تجربتي الشخصية

هذا الجزء خاص بتجربتي ، ماينطبق علي قد لاينطبق عليك والعكس.

حقيقةً السنة هذي كانت أصعب بكثير من السنة التحضيرية ولا يوجد مقارنة ، وحتى الجانب النفسي كانت أصعب، أسئلةٌ كثيرةٌ تطرح كل يومٍ ، ويبدأ وسواسُ الشّكِ “كيف بكون طبيب ناجح؟” “هل انا بالمكان الصحيح؟” “كيف بعالج الناس؟ وانا احس نفسي مو فاهم” …. وكثير أسئلة تطرح بدون جواب ، مثل دائرة كل ما تحركت ترجع لنفس النقطة …

بمجرد دخول كلية الطب بدأ الرعب ينتشر! “معقوله انا دخلت طب؟” الطب صعب ” كيف بمشي؟

  • الطبُ كان خيالًا بالنسبة لي ،أصبح اليوم حقيقة ، وانهيت سنة كاملة منه ، نعم المشوار مرهق ومتعب وشاق جدًا ، لكن اكتشفت أن الجميع “بيمشي ويعدي” اذا اعطى السنة حقها ، أوصف لكم دراسة الطب هي أشبه بمغامرة ، يوم تطفش منها ، يوم تحبها ، يوم تكرهها ، يوم تتمنى أنك تطلع وتتحسف أنك دخلت من الأساس ، ويوم تقول الحمدلله أني دخلت ، عالم مختلف لكنه رائع!!
  • الناس الموجودة أشكال وألوان بتقابلون شخصيات كثيرة ، المتعاون ، الأناني ، السعيد ، الكئيب ، المتفائل ، والمتشائم .. وراح تتعامل معهم كلهم لكن خلك حذر ، وخذ منهم الشئ اللي يفيدك فقط
  • ابتعد عن النوع المتشائم واللي يكسر باللي حوله ، يقولون صعبماينفهممايخلصفيه أشخاص هذي طبيعتهم دائمًا ولا راح يتغيرون .. وابعتد عن النوع الكذاب “مابذاكر ، ماذاكرت بسحب عليه مو مهم … وغيرها من الأكاذيب ، عليك بنفسك ولا تهتم لحديثهم. 
  • كن متفائلًا ولكن باعتدال ، متعاونًا ولكن لاتكون ساذجًا ، سعيدًا لكن لاتهمل حزنك.
  • السنة كانت مختلفة بما تعنيه الكلمة من معنى ، من ناحية الكمية الضخمة ، العلاقات الاجتماعية ، التنافسية العالية لكن ليست مع الدفعة ، بل تنافسية مع نفسي ، لكي أثبت لنفسي من أنا ، فما قيمة الإنجازات إذا لم تكن راضٍ عن نفسك عزيزي!!
  • السنة هذي بالنسبة لي كانت سنة ملحمية مثل ماوصفت السنة التحضيرية ، كان فيها أحداث كثيرة ، أما بالنسبة للضغط النفسي فهو أكبر بكثير من التحضيري ، بالتحضيري كان “يارب ادخل التخصص” ، لكن اليوم أقول “يارب اكون طبيب كويس وراضي عن نفسي!!” ممكن معلومة ماتقدر تفهمها تنكد يومك وتضايقك وتبدأ تشكك بنفسك ، لكن تأكد أن الله حطك بالمكان هذا وأنت تستحق فحاول ولاتتحطم ..

لعل السطر الذي حرم عينيك النوم ليلةً، شفاء لداءٍ أرّق العليل ليالٍ طوال

من الأشياء اللي صدمتني بالكلية أنه ماراح تاخذ اللي تستحقه دائمًا ، كثير أمور يتم التقييم من قبل دكتور، فلا تتوقعون تأخذون الدرجة اللي تستحقونها دائمًا ، وممكن تنقصون ولا تعرف وش السبب ، بس هذا مايخليكم تتكاسلون ، لكم هذي الحياة مو مثالية ،  بس أنتم عليكم تعملون وكل شيء بيد الله، يعني صارت أنه شخصين نفس الحل بالضبط ودرجاتهم مختلفة .. 

أهم شي هذي السنة كان كيف تستمر بهذا السباق ، بدون ماتتعب وبنفس الوقت تقدم اقصى ماعندك …

سالفة أنه تجي بعد ماينتهي السمستر الأول وتكتشفون أنكم جبتوا العيدمابينفع خصوصًا مع النظام عندنا ، مافيه تعويض فالمطلوب منكم تشدون حيلكم بالاختبارات أو المشاريع القادمة لأن النقص مابيرجع ، فلاااازم تعطون دراستكم كامل اهتمامكم وبالإضافة تراعون صحتكم النفسية والجسدية ولا تكلفون أنفسكم فوق طاقتها عشان مايجي وقت تقولون خلاص مانبي أو مانتحمل تعبنا

  • معدلكم مهم ومهم جدًا!! وبتجي ناس تقولكم المعدل مايهم زي اختبار الهيئة ، صحيح المعدل عليه ٣٠٪؜ لكن بتفرق ولو قليل؛ طالب جايب معدل ٤.٥ وطالب جايب ٣.٥ فيه فرقه بينهم  لكن حط ببالك معدلكم مو شرط يمثلك دائمًآ ، ممكن السنة صار لك ظرف وما أديت كويس ونزل معدلكوش يعني؟ يعني السنة اللي بعدها تعوضون وتشدون حيلكم وتتجنبون اخطاؤكم وترفعون معدلكم ..
  • المعدل ممكن ينزل ونزول مو بسيط لكن لا تخلون هالشي يكسر عزيمتكم ، لكن يشحنكم ويبنيكم من جديد والمثل يقول الضربة اللي ماتموتك تقويك!

السؤال الأصعب هل دراسة الطب تعني انتهاء حياتي الاجتماعية؟

  • ايه و لا بنفس الوقت ، هذا الشيء أنتم تتحكمون فيه يعني أنتم توازنون بين هذي الأشياء .. بعض المرات راح تتركون الطلعات عشان تذاكرون ، لكن مع تنظيم الوقت وترتيبكم للأولويات بيكون وضعكم ممتاز ، انا هالسنة قابلت أشخاص اكثر من التحضيري وتعرفت على ناس اكثر بعد .. باختصار هالسنة أنت كيف تبيها بتكون

ختامًا

الطبُ تخصصٌ ممتعٌ عظيمٌ ، ولكنه شاقٌ ويحتاج جدًا واجتهادًا ، الناس بتشوفك وتعاملك كطبيب، ممكن اهلك وأصدقائك يسألونك عن مرض ، وراح يقولون لك أسراره ويسلمونك أنفسهم ، فلزم عليك الجدُ والاجتهادُ ، هذا مسار أنتم دخلتموه رغبةً لا اكراه ، واجب عليكم ثتبون جدارتكم به ، لأن من سنة ثانية الناس تناديك دكتور ، بتشوفون ناس بحملات ، المجتمع يراكم كقدوة ، طفل بيقولك راح اصير دكتور مثلك .. فالله الله بهذي المسوؤلية.

فعلًا تخصصكمْ عظيمٌ وأنتم كذلك ، أسالُ الله للجميعِ التوفيقَ والنجاحَ وإخلاصَ العملِ لهُ سبحانه وتعالى.

IMG_6568
هذي فرحة أمي بأول زيارة للمستشفى

عبدالعزيز الفايز ..

“You can’t get through medical school if you don’t have a strong will and a strong constitution.”

-ken Jeong

الشكر للي ساعدوني بالمراجعة والتدقيق واقترحوا علي عشان تطلع المدونة بشكل مفيد .. لاتنسوهم من دعائكم