آخر تحديث:

السلام عليكم أنا عبدالعزيز طالب طب في جامعة الإمام عبدالرحمن بن فيصل أتممت سنتي الثالثة، أحببت أن أشارككم تجربتي الجديدة بعدما انتهيت من كتابة النصف الأول من روايتي بنهاية هذا العام الدراسي.
أخيرًا انتصف المشوار وانتهت السنوات ما قبل السريرية (Pre-clinical Years) بخير 😍🥳

وسنبدأ بإذن الله مشوارًا جديدًا ورحلة شيقة أشارككم تفاصيلها كل عام …

أتمنى لكم تمام الصحة والعافية وأن تكونوا بأفضل حال دائمًا، وأسأل الله أن يرفع هذا الوباء ويرحمنا برحمته وأن تعود الحياة أفضل وأجمل مما كانت عليه.

بداية أبارك لكم النجاة من سنة ثانية، كانت سنة صعبة ومتعبة إلى حدما،
كونها مرحلة انتقالية ومختلفة كليًا عن سابقتها من السنوات.
لكن بانتهائها والخلاص منها فقد تعلمتم مبادئ الدراسة في كلية الطب
وأصبحتم جزءًا من هذا الكيان؛ لذا عليكم الاستمرار والقتال من أجل الوصول
إلى شغفكم وحلمكم ومن أجل تحقيق طموحاتكم التي قادتكم إلى هذا المكان
بعد توفيق الله ♥️♥️

أبدأ من حيث انتهيت في مدونتي السابقة، لذا لن اذكر تفاصيل ذكرتها سابقًا، كدراسة الطب وطبيعة المقرر في جامعتنا والمواد وغيرها من التفاصيل، لأنكم تعرفونها وما يكون المحتوى أطول، لكن اللي ما قرأ المقالة يقدر يطّلع عليها بالضغط  (بين الحقيقة والخيال … تجربتي مع السنة ثانية طب)

هذا العام مختلف جدًا ومميز، أحداث كثيرة، مهارات جديدة، أشخاص عن قرب، مشاعر متضاربة، شتات؟
لا أعلم لكن المؤكد أنّ في هذا العام اجتمعت جميع الأشياء…
يبدأ العام الدراسي مثل أي عام لكن الجميل فيه التنظيم والتناسق بين المناهج، نبدأ بالجهاز التنفسي فتعلمنا تشريحه، وكيفية عمله، الأمراض التي تصيبه، علاجها، وكيفية أخذ التاريخ المرضي وإجراء الفحص السريري..
بالنسبة لي كانت هذا العام أفضل بكثير، من نواحي عدة أهمها التنظيم والمذاكرة؛ تدرس وتفهم وتربط معلوماتك ببعض، ماتتشتتون وهذا بحد ذاته نعمة 😄

هل السنة أصعب؟

الأجوبة تختلف، لكن خذ مني، الصعوبة موجودة وهذا شيء طبيعي كونك أصبحت أكبر وأساسك أمتن، لكن تعاملك مع هذه السنة سيكون أفضل كونك مريت بتجربة سابقة وأصبحت الخبرة موجودة عندك. المحتوى ضخم لكن تقدرون تنجزون وتجيبون درجات، وترفعون معدلاتكم باختصار تعطي دراستك الوقت راح تعطيك المقابل. السنة كمحتوى ماهي أسهل، الجدول أخف صحيح، لكن المقرر دسم!!! الجدول خفيف لكن بالمقابل معلومات ثقيلة. لذا المذاكرة أول بأول مثل ما وصيتكم سابقًا لأنه في حال تراكم عليك شيء المتضرر الوحيد هو أنت وأنت فقط. لذا تنظيمك لوقتك ومذاكرتك بشكل مستمر تساعدك تنجز وتحصل درجات بإذن الله.

دراستكم بتكون By Body System فمثلًا الجهاز التنفسي تدرسونه من كل جانب وهذا الشيء جدًا مفيد وممتع لكم. بحيث يسهل عليكم تربطون دراستكم ومعلوماتكم ويصير أساسكم قوي وراح تفهمون بشكل أفضل مقارنة بسنة ثانية.


المواد

مافيه شيء جديد عليكم والنظام نفسه، المواد، الـ PBL، معامل التشريح، مهارات سريرية (Clinical Skills)

الدرجات والاختبارات

هذي السنة فيه تعديلات على نظام الاختبارات، وتوزيع الدرجات، فصار بدال اختبار واحد منتصف الفصل الدراسي صاروا اختبارين. ما الفائدة؟
المحتوى بالاختبار أقل، ولو أني لاحظت الجدول انضغط عشان تدخل كمية أكبر بس ماهي مشكلة…
درجاتكم ما بتطير بسبب اختبار واحد فإذا نقصت شد حيلك وتعوض بالاختبار الثاني. الاختبارات نفس سنة ثانية MCQ, EMQ, and SAQ
الدرجات تغيرت بزيادة درجات الاختبارات التحريرية، وتقليل درجة اختبار ال OSCE.
عمومًا توزيع الدرجات ما هو أولويتكم بس استفسروا عنه بداية السنة في حال صار تعديل.

هذا الجدول وكل المكتوب مر عليكم العام وتعرفونه اكيد، لكن الجديد عليكم هو
SPC, Field Exercise, and Med Knowledge وبإذن الله اوضحها بالتفاصيل.

التوزيع الأساسي للدرجات قبل التعديل بسبب الأزمة -دفعة٢١٨-

نبدأ بمحتوى هذا العام الدراسي بشكل عام، وكان مقسم كالتالي

الفصل الدراسي الأول

  • الجهاز التنفسي Respiratory System 
  • الجهاز الهضمي Gastrointestinal tract
  • الجهاز البولي/الكلوي Renal(urinary) System
  • جهاز الغدد الصماء Endocrine System
  • الجهاز التناسلي/التكاثري Reproductive System

 

الفصل الدراسي الثاني

  • علم الدم Hematology
  • تشريح الرأس والرقبة Head and Neck Anatomy
  • علم الأعصاب (الجهاز العصبي المركزي) والتشريح العصبي Neurology and Neuroanatomy

Head and Neck و Neurology متداخلين ويمشون مع بعض. ما هو شيء مهم وذكرته عشان تأخذون تصور وتنظمون أموركم.


🏥 Health Promotion & Knowledge Management 🏥

الصحة (Health) بيكون بشكل موازي وراح يكون فيه تكرار من سنة ثانية وفيه أشياء جديدة.
MoM HEP ما راح يكونون متواجدين معكم زي سنة ثانية، باستثناء كم محاضرة MoM نهاية السنة وما اخذناهم بسبب الظروف.

  • الفصل الأول يتكلم عن التثقيف والتوعية الصحية، والطب البديل والاخلاقيات الطبية، وفيه سلسة محاضرات طويلة بعنوان Knowledge Management وكانت عبارة عن سبع محاضرات تتكلم عن كيفية البحث عن المعلومة الطبية، مصادر البحث وكيفية استخدامها، وكيف تنتقد/تقييم دراسة أو بحث بحيث تشوف هل هو موثوق أو لا، ومن ضمن هذي المحاضرات مراجعة للإحصاء الحيوي Biostatistics وتتكرر عليكم معلومات سنة ثانية بمحاضرة وحدة لذا استعدوا.

كان عندنا Tutorial خاص بالـ Med Law رهيب ونقاشات حلوة واخذناها مع البروفسور ريتيش وفعلًا أضاف لنا الكثير من المعلومات بخبرته بهذا المجال.

  • الفصل الثاني المحاضرات أقل لكن المحتوى مشابه، باستثناء جزئية تتكلم عن اتخاذ القرار، ووضع استراتيجيات وخطط التشخيص مثلًا.

المقرر سهل وبسيط وتكرار في بعض الأحيان، عدد المحاضرات لا يستهان فيه. بالإضافة الإدارة قللت عدد الأسئلة عليها وزاد التركيز على المواد العلمية، فعليه تلاحظون عدم توزان بين عدد محاضرات والأسئلة.


🧬 Biochemistry 🧬 

المحاضرات أقل مقارنة بسنة ثانية.

  • الفصل الأول 13 محاضرة تقريبًا مواضيع مختلفة عن الطاقة، الدهون، البروتينات، المعادن، الفيتامينات، الهرمونات، وجزئية عن التحاليل المختبرية وتقييم الحالة الغذائية، ومحاضرتين نهاية الفصل عن العيوب الخلقية وكيف نمنعها. المحاضرات سهلة ومعلوماتها مباشرة.
  • الفصل الثاني 7 محاضرات ومرتبطة بعلم الدم Hematology، خلايا الدم الحمراء تركيبها ووظيفتها، تحاليل الدم والأمراض اللي تصيب خلاياه بأنواعها وأسبابها، السرطانات والأسباب الجينية لأمراض الدم، Tutorials عن Hemostasis and thrombosis و Anemia and white blood cell abnormalities، الموضوعات ممتعة وفيها معلومات جديدة. والمادة بشكل عام سهلة وبسيطة وممتعة خصوصا ال Hematology.

 

🦠 Pathology 🦠

  • الفصل الأول بدون محاضرات.
  • الفصل الثاني تقريبا 5 محاضرات أول الأسابيع ومرتبط بال Hematology، مثل نقل الدم واللي ممكن يسببه، Neoplasm وعبارة عن مراجعة لسنة ثانية لكن بدون التفاصيل اللي ذاكرها كويس ما راح يواجه صعوبة أبدًا، محاضرة عن Leukemias & Lymphomas وأنا فعلًا ممتن للدكتور عمرو شرحها بكل إبداع وأتقن شرحها لدرجة ما تتخيلون، فيه طلاب أعجبهم التخصص بعد شرحه، يقول المهم والمطلوب منك بهذا المستوى والمعلومة هذي تأخذها العام القادم. وللأمانة محاضرة Myeloid disorder كانت طويلة ومعلوماتها كثيرة وماهي مرتبة بس بإذن الله تتعدل وتقدم بشكل أفضل. المقرر بسيطة جدًا ومعلومات أسهل من ثانية بكثييير وبإذن الله تستمتعون فيه.

💭 PBL 💭 

المواضيع أقل ونفس النظام ما فيه شيء بيختلف عليكم أبدًا. المواضيع أحسن من سنة ثانية وراح تكون مرتبطة بكل سستم تدرسونه.


🩺 Clinical Skills 🩺

راح يختلف على حسب الجهاز اللي تدرسونه، بس غالبا تغطون التاريخ المرضي، الفحوصات السريرية والتحاليل اللي ممكن تطلبها. للأسف من أجمل مزايا النظام عندنا لكن بالمقابل الأضعف والأسوأ بالتطبيق، ممكن دكتور يضيف لك معلومة ويساعدك ودكتور يدخل ويطلع ما اخذت منه معلومة، ومن الأشياء اللي استغربها أسئلتهم بالاختبار دائمًا سبب اختلاف بين الطلاب وما اشوفها بمستوى الشرح. ما راح يكون مطلوب منكم زيارات للمستشفى هذي السنة، وكان من الأشياء اللي افتقدتها وتمنيت وجودها.

  • الاوسكي OSCE
    تم الغاؤه لدفعتنا MED218 بسبب ظروف هذي السنة، لكن نفس سنة ثانية بالوقت، والمحطات. بيكون ما بين فحص او تاريخ مرضي، وفيه مواضيع الدفعات السابقة نبهت عليها كونها مهمة جدًا مثل
    (Breast examination, Inhalers, Glucometer, Mental State Examination) وتتكرر كل سنة غالبًا. وبتمر عليكم خلال سنوات دراستكم أو ممارستكم للمهنة لذا التركيز عليها واجب.

قبل ادخل بتفاصيل المواد،  راح تلاحظون ثقل خصوصًا بالاناتومي، واشوف الكتاب مهم، عشان تفهمون، بالإضافة إلى مقاطع الفيديو كونك تحتاج تتخيل وتتصور تراكيب داخل الجسم مثلا؛ والكلمات ما توصلها لك. اليوتيوب كان جدًا مفيد وما فيه قناة محددة، فقط اكتب الموضوع وتابع لك أكثر من مقطع. المعلومات راح تتكرر عليك صحيح، بس راح تتكون بمخيلتك الصور بدال الكلام النظري.



الفصل الدراسي الأول


Respiratory System

سهل وبسيط وما فيه تعقيد.
Anatomy
لطيف وفيه تكرار بسيط من سنة ثانية، راح تأخذون محاضرة Principles of viscera and body cavities بالبداية وتتكلم عن الاحشاء الداخلية وتنصيفها وتجاويف الجسم ومصطلحات مهمة، إذا ما فهمتوا 100% ترى الوضع عادي لأن المعلومات راح تتكرر عليكم بعدين بس على الأقل افهموا 60-70% من البداية لأنها تعتبر أساس لكم، وبحيث إذا جاء وقتها تزيد نسبة الفهم عندكم والا تضيعون ☹️
المحاضرات بشكل عام تتكلم عن الرئة وMediastinum وفيه هيستولوجي.
Physiology
كان له نصيب الأسد، كان يتكلم عن آلية التنفس، تبادل الغازات، التنفس بالمرتفعات أو بالأعماق (الغوص)، وفيه لاب عملي. المقرر كان سهل بس يحتاج شوية جهد.
Microbiology
ممكن كان أصعب شيء بالنسبة لي بهذا الجهاز. محاضراته طويلة ومخلوقات كثيرة 🤣
لكن بعد محاولات سويت ملخص فحسيت الوضع صار أرتب وأسهل.
راح تدرسون مجموعة من الأمراض اللي تصيب الجهاز التنفسي أسبابها، وكيفية تشخيصها.
Immunology
محاضرتين وحدة عن الحساسية والثانية تكرار وتذكير لبعض المعلومات من محاضرات سنة ثانية.
Pharmacology
محاضرتين خفيفة وحلوة تتكلم عن علاجات بعض الأمراض التنفسية.


🍏🍎 GIT 🍏🍎

هذا ما أدري كيف يوصف لكن السهل الممتنع، جزئيات سهلة وممتعة وجزئيات تكره نفسك.
Anatomy
أصعب مقرر بهذا الجهاز والصعوبة بسبب كمية المعلومات غير طبيعية والتفاصيل وفوق كذا ٥ أسابيع لاب!!! راح تأخذون جدار البطن والغشاء البريتوني (Peritoneal sac)، تشريح الجهاز الهضمي، الكبد والمرارة والبنكرياس والطحال، وجزئية عن التشريح الاكلينيكي للجهاز الهضمي. من باب الذكر صار عندنا إشكالية بالاختبار وأتمنى يشوفون لها حل، بالاختبار الأول كان تقريبا يشمل جميع المحاضرات النظرية كونها شرحت خلال أسبوع، ويوم صار الاختبار الثاني دخلت معنا اللابات، فصار لازم تدرس المحاضرات الاختبار الأول + اللاب، رغم انهم قالوا ما يحتاج ترجعون للمحاضرات بس للأسف كان الوضع سيء والاختبار أسوأ.
Physiology
كان مرة بسيط وسهل جدًا ومعلومات التحضيري قاعدة ترجع لكم، المحاضرات مرتبة مره، وبتكون عن كل عضو بالجهاز، مثلا محاضرة عن المعدة ووظيفتها ووش تسوي…إلى آخره.
Microbiology
بالنسبة لي أمتع وأسهل بكثير من اللي قبل ولو ان فيه اسماء كثيرة، راح تأخذون البكتيريا، الفيروسات، والطفيليات اللي تصيب الجهاز الهضمي.
Pharmacology
كان غثيث للأسف أتوقع ٤ محاضرات وخصوصًا محاضرة العطارة معلومات كثيرة وأسماء اعشاب واخر شيء عليها سؤال! لكن محاضرة GERD كانت جيدة وتخفف من غثاثته صراحة.


Renal (Urinary) System

Anatomy
 لا بأس فيه لكن الهيستولوجي كان مزعج، بالإضافة لوجود محاضرة Embryology.
Physiology
غالب المحاضرات هذا الجهاز كانت عليه وأقدر اقسمه لجزئين
الأول يتكلم عن الكِلية، وظيفتها وعملها والفشل الكلوي والتبول. شرحها لنا الدكتور أحمد بدر بإبداع وقدم لنا مادة علمية ممتعة ومحاضرات لاتنسى.
الثاني يتكلم عن سوائل الجسم وكيفية اتزانها و Acid-Base balance من أهم المحاضرات -وأسئلتها بكل الاختبارات- وكانت لعبة الدكتور إياد وراح تتذكرون الشرح بصوته وبأسلوبه المرح.
Microbiology
عبارة عن محاضرتين تتكلم عن التهابات مجرى البول مره سهلة وبسيطة.
Pharmacology
 محاضرة وحده وتكلمت عن مدرات البول وعلاج بعض اضطرابات الكلى.


Endocrine System

Physiology
علم وظائف الأعضاء كان نجم هذا الجهاز. بتتكلمون عن الغدد الصماء بداية من مكونات الجهاز، وبعدها تمشون على الغدد وتشوفون إبداع وتناسق رهيب بينها، هرمون يفرز من غدة ويحفز غدة أو عملية بالجسم. تفاصيل دقيقة وصغيرة أي خلل فيها يسبب مشكلة. وخلال هذي الفترة راح تدرسون أمراض لها علاقة بغدد الجسم مثل السكري، كسل الغدة الدرقية، ومتلازمة كوشنيغ، وغيرها الكثير… وهذا كان من باب الذكر ليس الحصر.
المحاضرات والتفاصيل كانت ممتعة ومثيرة للإهتمام، والدكتور أحمد السني يعود مرة أخرى ومحاضراته تنتهي هنا وودعناه. وفعًلا أبدع وزاد الشرح جمال وكان جدًا حريص أنه الجميع يتقن وذكر أهميته بالممارسة سواء كانت بالسنوات القادمة أو حتى بعد التخرج، وكان يعطي من التهديدات لذا انتبهوا 😡
Anatomy
محاضرة عن وحيدة بالإضافة إلى هيستولوجي.
Pharmacology
بتدرسون الأدوية لأهم الأمراض مثل السكري، هشاشة العظام، أمراض الغدة، ومرض الضغط.


Reproductive System

Anatomy
ثلاث محاضرات عن الحوض وتشريحه السريري، الأعضاء التناسلية بالتفصيل، والعِجان (Perineum) المعلومات والتفاصيل كثيرة لكن هذي طبيعة المقرر. وإضافة إلى هيستولوجي وكان على ثلاث محاضرات. وكثيرة من الأسئلة عليه جت بصيغة SAQ.
Physiology
بتدرسون تفاصيل التلقيح، تكون الجنين والمشيمة، الولادة، البلوغ، دورتي المبيض والحيض، ووظائف الجهاز التناسلي الذكري .
Microbiology
محاضرتين عن الأمراض المنقولة جنسيًا بالإضافة إلى Tutorial


👩🏻‍⚕️👨🏻‍⚕️ Student Project Cases 📝

الشيء الجديد عليكم واللي راح يكون معكم من بداية الفصل إلى نهايته وعليه 5 درجات.
أول أسبوعين راح يكون عندكم محاضرتين تعريفية ويفهمونكم الموضوع أنا ما فهمت من البداية، ويوم بدينا نشتغل بدت تكون الصورة أوضح.
الفكرة منه راح تنقسمون مجموعات –كل قروب PBL ينقسم مجموعتين، بتنزيل لكم القائمة بالاسماء مع الموضوع فلاتشيلون هم- ويعطونكم موضوع علمي وبناء عليه راح تشتغلون وتنفذون المتطلبات وتسلمونها وفقًا للجدول الزمني.
طول الفترة تشتغلون على كتابة ملخص وعليه 60% من الدرجة الكلية. التفاصيل كثيرة مطلوب عدد كلمات ماتتجاوزه، ومصادر، ونمط كتابة محدد. لازم تتعاونون كمجموعة وتنسقون الشغل بينكم لأن أي شخص راح يقصر بيضر المجموعة. لذا كل عضو يتحمل المسؤولية وما يظلم اللي معه.
مهم جدًا تنتبهون للوقت خصوصًا عندكم اختبارات ومذاكرة فتنظيم الوقت يقلل عليكم الضغط عشان تطلعون بشغل مرتب بالنهاية.
انتبهوا من النسخ لأنكم بتستخدمون (Plagiarism Check) ويطلع نسبة النسخ، فإذا طلعت النسبة عالية فهذي مشكلة وأنتم عارفين الوضع، وفيه مجال تعدلون أكثر من مرة.
عندكم مشرف ترجعون له وتجتمعون معه أربع مرات طوال فترة العمل، تقدرون تنسقون معه في حال تحتاجون اجتماعات زيادة، والغالب متفاهمين ومتعاونين. وعنده 10% من الدرجة، فضروري الالتزام بحضور الاجتماعات وتتفاعلون معه عشان تأخذون درجتكم كاملة.
الجزئية الأخيرة المطلوبة منكم بنهاية الفصل الدراسي -الأسبوع 15- تقدمون عرض عليه 30% من الدرجة وبتكون فيه لجنة تقيمكم ويسألونكم بالنهاية. لذا واجب عليكم تستعدون وتفهمون كل حرف لأنهم باختصار يتأكدون أنكم كاتبين كل شيء وفاهمينه، فيحاولون يحجرون لكم. لا تخافون أسئلتهم غالبًا من شرحكم ويفترض تعرفون الإجابة، قليل جدًا يجي دكتور يجيب سؤال من زحل 🪐  ..
لازم تشتغلون على العرض من بدري سالفة بيوم وليلة ما ينفع لأن محدد لكم وقت عرض، فتدربوا مع بعض واحسبوا الوقت لأن لو قدمتوا العرض بسرعة يعاتبونكم ليه اسرعتوا!! وإذا طولتوا يقاطعونكم فحاولوا توازنون.
اطلبوا شروط عرض الباوربوينت قالوا لنا نفسها نفس السمنار. وتراها مهمة فيه ناس قالوا لهم الألوان غير مناسبة، الشريحة محشوة كلام –قاعدة (6×6) مهمة– فممتاز تعرفون المتطلبات عشان ماتنقصون على أشياء بسيطة.
العرض عرضكم!! ابدعوا وقدموا كل ماعندكم وفكروا خارج الصندوق دائمًا عشان تحصلون الدرجة المرضية…
تقييم العرض بيكون جزء للمجموعة ككل، وجزء تقييم فردي -مهارات الإلقاء وغيرها-.

بالمختصر فكرته قريبة من السمنار بسنة ثانية لكن علمي بحت.


📚 Medical Knowledge Assignment 📚

واجب صغير وبسيط جدًا بس بتتكسر يدك وأنت تكتب 😓  عليه درجة يتيمة. وهو عبارة عن مصطلحات طبية تكتب التعريف/الشرح كان بحدود ٣٠ مصطلح، والمفروض انه الفصل الأول لكن اخذناه بالفصل الثاني.


بكذا نقول الفصل الدراسي الأول انتهى 🥳

 



التدريب الحقلي (
Field Exercise)

بعد الإجازة ترجعون لنظام مختلف، وتجربة مدتها ثلاث أسابيع، تجربة فريدة ومميزة وتضيف الكثير على جميع الأصعدة وتحت اشراف قسم طب الأسرة. اعتبره مقرر مستقل بحد ذاته، عليه ٦ درجات وما عليه اختبارات، وبانتهائه ينتهي كل شيء، وترجعون للدراسة والمحاضرات.
خلال هالفترة ماعندكم محاضرات مثل اناتومي وفسيو…إلى آخره.

يوجد اختلاف بين الأولاد والبنات لذا تم فصل كل قسم مع العلم أن كل شيء قابل للتغيير

👩🏻 البنات 👩🏻

مدته 3 أسابيع على 3 مهام وكل أسبوع التركيز على مهمة منهم. توزيع المهام على الأسابيع بالترتيب كالتالي:

  • كتابة مقترح بحثي Research Proposal
  • جمع وتحليل البيانات Data Collection & Analysis
  • حملة صحية تثقيفية Health Exhibition
    • تقسم الدفعة الى 10 مجموعات كل مجموعة فيها 12-13 طالبة. كل مجموعة بتنقسم لمجموعتين A&B.
    • كتابة المقترح البحثي العمل بيكون كمجموعتين A&B
    • الحملة الصحية التثقيفية العمل كمجموعة وحدة.
    • جمع وتحليل البيانات بيكون جزء فردي وجزء كمجموعة، بالإضافة بيكون مطلوب منكم عرض للبيانات نهاية الأسبوع الثالث.
    • بيتم توضيح تفاصيل كل مهمة فيما يلي.
  • الأسبوع الأول:

المطلوب في نهاية الأسبوع الأول هو تسليم المقترح البحثي كل مجموعة بتنقسم إلى مجموعتين A&B وبتكونون تحت إشراف دكتورة.

    • الأحد والإثنين محاضرات.
      المحاضرات في البداية تهيئة وبعدها سلسلة محاضرات تختص بالبحث بدءًا من كيفية اختيار موضوع البحث وانتهاءً بكيفية كتابة المقترح البحثي وعرضه.
    • الثلاثاء تجتمعون بقاعات PBL مع المشرف وتعرضون عليها موضوع البحث وأهدافه
      -موضوع البحث من اختياركم تقدرون تختارون أي موضوع- ثم توزعون المهام وتجتمعون معها يومي الأربعاء والخميس، حتى تساعدكم بكتابة المقترح البحثي وتتابع تقدمكم.
  • الأسبوع الثاني:

الأسبوع الثاني مطلوب فيه تجميع البيانات والتجهيز للحملة الصحية اللي بتكون بالأسبوع الثالث.

    • الأحد: محاضرات لكيفية التجهيز للحملة وبعدها تتقسم الدفعة لأربع مجموعات (A,B,C,D) تُعطى نفس المحاضرات لكل مجموعة ولكن من قبل دكتورة مختلفة، (قاعات مبنى 350). المحاضرات بتكون عن أنواع الدراسات، طرق اختيار عينة الدراسة، وكيفية تجميع البيانات. ويُشرح لكم استبيان البحث الذي سيستخدم لجميع البيانات -الاستبيان جاهز فقط توزعونه-.
    • الاثنينجمع البيانات. تُقسم الـ 10 مجموعات بحيث تتوزعون على كليات الراكة و كليات الريان -سيتم توفير باصات-.
      كل مجموعة بتكون معهم مشرفة ويأخذون استبيان البحث ويوزعونه على 12-15 طالبة.
    • استبيان البحث إما يكون مطبوع ورقيًا أو يكون إلكترونيًا باستخدام برنامج Question Pro بعد ما تتفقون مع المشرفين بحيث يراجعونه ويوافقون عليه.
      الاستبيان الالكتروني أفضل بكثير من الاستبيان الورقي، لأنكم تنقلون البيانات مباشرة للـ SPSS وهو نظام لتحليل البيانات. أما ورقيًا فبيكون عليكم عبء نقل وإدخال البيانات يدويًا على النظام.
    • الثلاثاء والأربعاء والخميس: تقدم لكم محاضرات عن نظام الـ SPSS تتعلمون من خلالها كيفية إدخال البيانات وتحليلها باستخدامه. مهم تركزون بالمحاضرات كونكم بتختارون علاقة من البيانات اللي جمعتوها وتطبقون عليها اللي تعلمتوه خلال المحاضرات وبتطلعون بملف شبيه بالـ Proposal، وبالأسبوع الثالث مطلوب منكم تقدمون عرض فيه تحليل للبيانات اللي جمعتوها “كامل المتطلبات والتفاصيل تشرح لكم وقتها”
    • خلال هالـ 3 أيام بتجتمعون مع المشرفة حتى تساعدكم باعداد الحملة. وكل مجموعة بيكون لها موضوع معين وعليها مهمة إعداد المحتوى العلمي للحملة ويتم مراجعته من المشرفة.
    • بنهاية الأسبوع المفروض يكون البنر حق الحملة وكل المطبوعات اللي تحتاجوها جاهزة للطباعة بمكتبة الجامعة. -الجامعة تكفلت بطباعة البوسترات والبروشرات. مطلوب وحدة من القروب تروح مع الباص ولو أكثر من بنت أفضل في حال صارت مشكلة وكذلك عند استلام الأغراض حتى تتساعدوا في حملها-.
    • الموضوعات جاهزة -تختلف على حسب الثيم المنتقى للسنة- وكان اختيار موضوع الحملة لكل مجموعة عن طريق القرعة.

  • الأسبوع الثالث:

المطلوب منكم في هذا الأسبوع هو عرض تحليل البيانات لأسئلة البحث واقامة حملاتكم التثقيفية الصحية.

    • الأحد: بتكونون مقسمين لأربع مجموعات (A,B,C,D) وتعرضون البيانات التي تم تحليلها باستخدام نظام الـ SPSS على الدكاترة ويعطونكم فيدباك يساعدكم على اعداد العرض التقديمي اللي بيكون بنهاية الأسبوع
    • الاثنين والثلاثاء والأربعاء موعد إقامة الحملات، وخلال يوم من هذه الأيام سيتم تقييم حملتكم -الطاولات والمفارش موفرة لكم، وتقدرون تطلبون شاشات عرض لو حابين، ولكن لازم تطلبونها قبل طباعة المطبوعات بمكتبة الجامعة-.
    • الخميس: اخر يوم، وبيكون فيه عرض تقديم للبيانات اللي جمعتوها وحللتوها خلال الأسبوع الثاني للإجابة على أسئلة البحث.
  • نصائح عامة
    • أهم نصيحة هي اختيار فريق جيد، لأن العمل جماعي وهذا أساس نجاح عملكم فاختاروا الفريق بعناية. العمل بيكون جدًا ممتع وخفيف لو كان الجميع متعاون.
    • الحملة هي عملكم الخاص، تقدرون تبدعون وتضعون بصمتكم فيها.
    • استغلوا فترة تعلمكم مهارة المقترح البحثي، لأنها مهمة جدًا ومفيدة لكم في كتابة الأبحاث مستقبلًا.
    • استمتعوا بالثلاثة أسابيع، لو كنتم منظمين وتنجزون مهامكم بسرعة بيكون عندكم وقت فراغ، البعض كان يستغله بالمذاكرة للأسابيع القادمة، والبعض استمتع فيه بطريقته. مهما كان خياركم اقضوا وقتكم بشيء تحبوه وبالتوفيق لكم جميع.

تم إعداد محتوى الفقرة السابقة من قبل الأخت لجين الحميد مشكورة 🙏🏻
تويتر : [email protected] 

👨🏻 الأولاد 👨🏻

قسم الأولاد صار فيه تغيير جذري واستحدث نظام جديد كليًا. دوامكم بمركز طب الأسرة والمجتمع. بالبداية يطلب منكم تتقسمون على عشر مجموعات ولكم حرية الاختيار.
اختيار المجموعات كان عن طريق البلاكبورد قبل بداية الدوام بس صار خلل، واضطرينا نكتب الأسماء وتُرفع للإدارة.
كل مجموعة عليها مشرفين وتجتمعون معهم هم المرجع لكم خلال البرنامج، ومن خلال هالفترة بيكون عندكم اجتماعات دورية مع المشرف وعليها تحضير. المشرف أول شخص تروح له إذا احتجت شيء وهو يساعدك أو يوجهك للمكان المناسب.
المقرر عبارة عن محاضرات، ورش العمل، وعمل ميداني، مطلوب منكم ثلاث مهام رئيسية (عرض الريادة الاجتماعية، مشروع تجربة المريض، وحملة التثقيف الصحي).
المقرر تحت التطوير، ودفعتي MED218 أول دفعة يطبق عليهم، فممكن يصير شيء جديد أو مختلف…

  • الأسبوع الأول

    • الأحد يوم تعريفي ومحاضرات عامة. الاثنين والثلاثاء عبارة عن ورش عمل ومحاضرات. الأربعاء كان عندنا ورش عمل عن المواضيع المرتبطة بحملة التثقيف الصحي. والخميس كان فيه زيارة لأحد الضيوف وتقديم عرض الريادة الاجتماعية. خلال ورش العمل أو المحاضرات بيكون فيه أسئلة على البلاكبورد، سهلة وقالوا اهميتها نشوف الطلاب المشاركيين فيعني انتبهوا.
    • عرض الريادة الاجتماعية بداية الأسبوع الأول راح يعطونكم شخصية بارزة بمجال الخدمة المجتمعية، وبنهاية الأسبوع تقدمون عرض وعليه تقييم سهل وبسيط. تتعرفون على شخصيات جديدة ومؤثرة وغيرت العالم. العرض عشر دقائق كحد أقصى ما فيه شيء يخوف الجميع يستمع لك كل مجموعة لها طريقتها، ولها محتوى مختلف. وبكذا الأسبوع الأول انتهى
  • الأسبوع الثاني

    • مشروع تجربة المريض
      • كل مجموعة يحدد لها مكان مثلًا قسم الأطفال بالمستشفى الجامعي، تزورون القسم وتسألون الناس عن تجربتهم والصعوبات والأشياء المعنية بتجربتهم، بالنهاية تحددون مشكلة من المشاكل، وتقترحون حل وتنفذونه أو تقدمون نموذج مصغر في حال ماقدرتوا تنفذونه. وترى مو مطلوب منكم تحلون مشاكل كبيرة ومستحيلة!! المطلوب Mini Project بسيط وبحل ابداعي.
        مطلوب منكم مقترح على صيغة ملف وورد تسلمونه نهاية الأسبوع وتتكلمون بشكل موجز عن المشكلة وحلها وخطة عمل المشروع وغيرها باختصار Proposal.
        الوضع فيه مرونة من ناحية وقت التنفيذ -تواصلوا مع المسؤول- أما Proposal يتسلم بوقته.
      • مطلوب عرض عن مشروعكم قدام لجنة والعرض هو نفس الProposal بس بوربوينت. وممكن فيه جولة على المشاريع.
      • مب لازم كل المجموعة تروح المستشفى بنفس الوقت، ممكن تنسقون بينكم وترتبون لكم جدول، عشان تنجزون شغلكم بالإضافة لشغل الحملة.
    • حملة التثقيف الصحي
      • الحملة بتكون بنفس وقت تجربة المريض.
        بنهاية الأسبوع الأول فيه قرعة يوزعون المجموعات على الأيام.
        لازم تنتبهون انه ممكن الحملة تكون بيوم تنفيذ المشروع أو تسليم الـProposal فلازم تنجزون، وبنفس الوقت تشتغلون على حملتكم. إدارة الوقت وتقسيم الشغل بينكم مهم، ناس تشتغل على الحملة وناس تشتغل على تجربة المريض وتتناوبون بينكم عشان الجميع يستفيد.
      • الحملات كانت بالواجهة البحرية بالخبر، وكل مجموعة راح يكون لها موقع مستقل، كلكم تقدمون نفس المحتوى لكن الفرق بطريقتكم وابداعكم بترتيب المكان والأفكار كل شيء بيدكم، وهنا يطلع الفرق بين المجموعات.
      • بالأسبوع الأول بتحضرون ورش عمل، عن المتلازمة الايضية، الصحة النفسية، اضطرابات النوم والألعاب، الإقلاع عن التدخين، والعلاج الطبيعي.
        مع تطبيق عملي مرتبط بالمواضيع. المطلوب منكم تحويل الورش إلى مادة علمية ومحتوى تقدمونه. وهنا مسؤوليتكم ممكن تكون أول حملة لكم، فهي أمانة تقدمونها لذا أحسنوا.
      • الحملة عليها جزء من التقييم، ابحروا بالتفكير فأفكاركم تميزكم عن باقي المجموعات.
    • الأسبوع الثالث
      • انتهينا من العمل الشاق وبقي القليل
      • يوم ترفيهي وكان بنادي الاتفاق ممتع وفيه تغيير جو.
      • يوم بعنوان Digital Innovation Day
      • يوم بعنوان Innovative Health Education
      • يوم عرض مشاريع تجربة المريض.
      • يوم ختام الأنشطة، فيه عشر دقائق لكل مجموعة تقدم Flashback لعملها الفترة الماضية، وكذلك إعلان المجموعات الفائزة.
      • الجميع راح يأخذ درجة عالية. الفكرة استفيدوا من المقرر ولاتشيلون هم الدرجات.
      • بالنسبة لتفاصيل الدرجات ما ذكروها نهائيًا.

الدرجات ماطلعت لنا ومحد يعرف كم جاب، لكن الجميع أخذ درجة كويسة سواءً البنات أو الأولاد…

بعد ماتنتهي الثلاث أسابيع ترجعون للدراسة والنظام العادي، وبتلاحظون ضغط بالجدول مقارنة بالفصل الأول وهذا طبيعي لأنكم تبدأون الدراسة بالأسبوع الرابع!!


🩸 Hematology 🩸

من البلوكات البسيطة والحلوة مافيه تعقيد وعندكم Biochemistry و Pathology ذكرت لكم التفاصيل بالبداية.
Microbiology
محاضرتين عن التهاب الكبد (Hepatitis) بأنواعه وبيكون حديثكم مربوط بطرق التشخيص ومهم جدًا تعرفون كيف تفرقون بين الأنواع + كيف تعرفون إذا الحالة نشطة؟ مطعمة؟ اصابة قديمة؟ مزمنة؟ وغيره. مره ممتع وبسيط ومعلوماته خفيفة وتحتاج فهم مش حفظ 😜
فيه Tutorial ومحاضرة عن ال Infection Control تتكلمون عن معلومات مهمة ومفيدة بحياتكم المهنية وسهلة خصوصًا بعد الازمة الجميع صار فنان بالـ Infection Control 😂
Immunology
5 محاضرات تقريبًا تتكلم عن مواضيع مرتبطة بالمناعة مثل الأمراض التي تصيب خلايا الدم البيضاء، مفهوم Autoimmunity ، والاجسام المضادة.
صحيح معلومات كثيرة وفيه اشياء جديدة عليكم ويمكن فيها صعوبة بس بشكل عام بس تحتاج تركيز وتذاكرونها أكثر من مرة.
Pharmacology
من المواد اللطيفة، فيها معلومات كثيرة، كانت ثلاث محاضرات.
ثنتين ولا أسهل اللي هم Anticoagulants و Treatment of Anemia
أما الثالثة Immunosuppressant and Immunomodulators كانت غثيثة

بالنسبة للمواد اللي ما ذكرتها ما عليها محاضرات مرتبطة بالبلوك.


💆🏻‍♀️ Head and Neck anatomy 💆🏻‍♂️

البلوك عبارة عن اناتومي 😂 فيه أشياء صعبة وأشياء سهلة وأشياء بينهم.
بتدرسون الجمجمة وعظامها والعضلات وظيفتها … وتدرسون تجويف الجمجمة، أغشية المخ، السائل النخاعي (CSF)، الأوعية الدموية والأعصاب المغذية.
ثم محاضرة Embryology ، تنتقلون منها إلى تجويف العين والأمراض التي تصيبها. وسبحان خالقها كيف المساحة الصغيرة فيها من أعقد وأدق تفاصيل التشريح، فعلًا اتقان لامتناهي تنبهرون من الجمال والروعة.

ثلاث محاضرات للأعصاب القحفية (Cranial Nerves)، محاضرة عن تشريح الوجه، فروة الرأس، الأنف، والفم.
ثم إلى الرقبة وتدرسون تفاصيلها وتقسيماتها، العضلات، الأعصاب والأوعية الدموية الموجودة.
محاضرة تشريح الأذن محاضرة بسيطة ومختصرة وفيها معلومات رائعة.
البلعوم والحنجرة (Pharynx & Larynx) تعتبر من المحاضرات الطويلة وفيها تفاصيل وتحتاج مخيلة، وممكن تكون صعبة لكن مع المذاكرة الجيدة والمراجعة أكثر من مرة تسهل عليكم.
بالنهاية محاضرة تلخص الـ Blood Supply of the Head & Neck.
وتختمون بالجزء الممتع بالنسبة لي وهو Clinical and Surgical Anatomy of the Head & Neck تتكلم عن مفاهيم مهمة ومعلومات جراحية لازم تعرفونها، مثال: عملية الغدة الدرقية والمضاعفات التي تحدث بسبب خطأ اثناء الجراحة (كاتلاف عصب مثلًا)، المحاضرة كانت ممتعة.
مجموع المحاضرات ممكن ١٤ غير اللابات، وبكذا البلوك انتهى.

١٠ منتجات ذكية لطلاب الطب والأطباء


🧠 Neurology and Neuroanatomy 🧠

سبب البكاء وسهر الليالي، لكن أمتع وأجمل وأعظم ما درست!!! علم بديع وجمال ودقة تتجلى عظمة خلق الله سبحانه وتعالى. فعلًا تدرك وتشعر بقيمة حواسك وأن الله أنعم عليك وأكرمك وأغدق عليك من الأنعم مايستحق الشكر والثناء. تلك الأشياء البسيطة التي نفعلها دون إدراك أو وعي عبارة عن منظومة متكاملة ومعقدة تفوق التصور…
استمتعوا فيه وأحبوه غير كذا بيكون معقد وممكن تكره حياتك والطب بسببه.
Anatomy
تدرسون محاضرتين عن الدماغ (Brain) بتفاصيله، جذع الدماغ بأجزائه (Brainstem).
المخيخ (Cerebellum) بس بيكون على هيئة Tutorial. محاضرة عن اتصال الـ Cranial Nerves بالدماغ، وبتفاصيل أدق وأعمق، وممكن تتكرر عليكم بعض المعلومات.
بالنهاية تختمون مع الـ Blood Supply to the Brain وفيها تفاصيل دقيقة ومهمة، مثلًا إذا صارت إصابة لهذا الشريان وش ممكن يتضرر ووش الآثار المترتبة عليه وهكذا.
مهم تعرفون بأن الـ Tutorials عبارة عن محاضرات بحد ذاتها بسبب كمية المعلومات.
عددهم ثلاثة، الأول عن المخيخ، الثاني عن جذع الدماغ والاصابات -مره مهمة وتحتاج فهم وحفظ- والأخيرة عن الحبل الشوكي بالتفصيل مثل الـ Tracts الموجودة والاصابات وأثرها …
تقريبا كل جزء مطلوب منكم نفس الأهداف. المعلومات ممكن تتكرر عليكم وهذا شيء مفيد كونه يساعدكم بالمذاكرة. شدوا حيلكم لأنه متعب ويحتاج وقت وارجوكم لحد يراكم المذاكرة!!!!!
Physiology
تسع محاضرات الغالب بسيط، والمعقد يكون بسبب تنسيق السلايدات.
المحاضرات بتكون على حواس الإنسان  كالسمع، الاتزان، الابصار، الحركة، محاضرة عن العقد القاعدية (Basal Ganglia)، محاضرة الكلام واللغة، محاضرة عن النوم والساعة البيولوجية، بعدها تتكلمون عن العصبونات الحركية العلوية (Upper Motor Neurons) وتختمون بمحاضرة عن حاستي التذوق والشم. المحاضرات ممتعة للأمانة، ومن الدكاترة اللي فعلا اضافوا الكثير وأبدعوا بالشرح الدكتورة خلود الغامدي 🤩
للأمانة من مكاسب التعليم عن بعد انها درستنا.
Microbiology
أربع محاضرات بالإضافة ل Tutorial، المحاضرات تتكلم عن الالتهاب التي تصيب الجهاز العصبي المركزي.
المحاضرات مقسمة بشكل عام للعدوى بسبب بكتيري، فيروسي، أو طفيلي.
من أسهل المحاضرات وبتعجبكم وما فيها تعقيد أبدًا.
مهم تعرفون ان أغلب الأسئلة تجي على صيغة Clinical Scenario مثلا طفل عمره … بالأعراض …. ويعطيك خيارات. الجواب بتعرفه إذا حصلت الـ Key Word بالسؤال لذا ركزوا.
Pharmacology
من الأشياء اللي تثير الفضول وتحثك على البحث.
عبارة عن ٧ محاضرات، النواقل العصبية، مضادات الاكتئاب، مضادات الصرع، مضادات الهذيان، أدوية مرض الرعاش (Parkinson’s disease)، المهدئات والتخدير، ومحاضرة عن التفاعلات الدوائية الضارة (Adverse Drug Reaction)
راح تشوفون تكرار بين المحاضرات ومعلومات جديدة، ومره تشوفون شيء بمحاضرة وتدرسونه بالتفصيل بمحاضرة ثانية.
بالنسبة لي كان ممتع لكن اللي ساعدني أكثر اني سويت ملخص للأدوية واستخدماتها، ومهم جدًا تعرفون الاستخدام المميز لكل دواء لأن ممكن فيه استخدامات مشتركة بينهم.
الأسئلة كانت Clinical Scenario ما ادري ممكن هل بسبب الاختبار اونلاين لكن فيها صعوبة الى حد ما.


هنا ينتهي العام الدراسي، ويبقى اختبار ال VIA 🤫


 🔥 Vertical Integrated Assessment 🔥
VIA

اختبار مستقل نهاية السنة.
بالنسبة لـ MED218 كان بعد الاختبارات النهائية، وممكن يكون قبل يعتمد على الجدول.
الاختبار عبارة عن MCQ  كان 80 سؤال لدفعتنا، وبعض الدفعات كان 100 إلى 120 سؤال.
شبيه باختبارات الـ USMLE STEP 1 أسئلة بصيغة اكلينيكية يشمل مقرر السنتين الثانية والثالثة ويركز على المعلومات الرئيسية والمهمة، يبون يقيمون معرفتك واتقانك لها.
ما فيه مرجع محدد بعينه تذاكر منه. لكن قالوا لنا بنوك الأسئلة بالإضافة لكتب USMLE STEP 1 ، مثل Kaplan and First Aid.

توضيح إذا نجحت بالمقرر ممكن ترسب بالـ VIA!!!!

في حال رسوبك بالمحاولة الأولى بيكون عندك محاولة ثانية.. والرسوب بالمحاولة الثانية يعني تعيد سنة ثالثة من جديد، الموضوع ما فيه مزح.
الكلام مب تخويف أبدًا لأن قليل جدًا جدًا الرسوب بس عشان تعرفون أهمية الاختبار. 
درجة النجاح تعتمد على متوسط درجة الدفعة بالاختبار.
بالنسبة لدفعتي الاختبار كان فيه صعوبة وأغلبه Cases لكن اللي ذاكروا بنوك الأسئلة قالوا الأسئلة جت منها أو قريبة!! بالإضافة المفروض يكون فيه Mock exam قبل الاختبار الفعلي عشان تتعرفون على الاختبار لكن ماقدروا يسونه لنا بسبب ضيق الوقت 😆



📖 
المراجع 📖 

الكتب اللي بذكرها ممكن تناسبك وممكن لا!! كلها متوفرة Pdf لذا لا تشتريها إلا إذا أعجبتك

Anatomy

  • Snell
  • Grant’s Atlas of Anatomy
  • Crossman Neuroanatomy
  • First Aid for Brain Strokes and Injuries

وقالوا لنا نكتفي بالمحاضرات والنوتس مع الدكتور، لكن اشوف بعض المرات السلايدات فاضية لذا ممكن تحتاج ترجع للكتب.


Physiology

  • Sherwood
  • Guyton physiology

الكتب ماكانت مهمة ومارجعت لها إلا مرات قليلة


Pharmacology and Microbiology

مبادرة Steps ماقصروا كانوا يوفرون الجزئيات المطلوبة من مقاطع سكتشي وكتاب FA وكانت تنفع ومفيدة.


بالنسبة للمواد الباقية غالبا تكتفي بالسلايدات واليوتيوب. وإذا مررره ترجع للمصدر المحدد بالمحاضرة (غالبًا ماتحتاج)


✏️ نصائح ✏️

  • النصيحة الأبدية ودائمًا اكررها، توكل على الله وأخلص النية له، ثم اطلب التوفيق وألح في طلبه 🤲🏻💛
  • دعاء الوالدين ورضاهم عليك أهم شيء، «رضا الله في رضا الوالدين، وسخط الله في سخط الوالدين» 💕💕
  • السنة تحتاج تتكيف ومرونة أكثر بتشوف صعوبات وضغوطات. تقاوم؟ تُكسر.
  • الوقت، الوقت، الوقت، ومليون مرة الوقت. تنظم وقتك تنتظم حياتك ودراستك وكل أمورك ⏳⏳⏳
  • أنا ضد مبدأ أن دراسة الطب عبارة عن عزلةٍ وانقطاع. مرات تحتاج تقعد وتدرس لكن كن منطقي، الساعة اللي تغير فيها جو وترفه عن نفسك أفضل من أربع ساعات تكذب على نفسك وماتدرس وقاعد على جوالك 🤓🤳🏽
  • حبوا أنفسكم ودلعوها من فترة لفترة 🥰🥰🥰 لأنكم تحتاجون تجددون طاقتكم وما يضركم بريك قصير. خصوصًا مع الاختبارين بتكون مذاكرتكم بشكل مستمر وما تتراكم عليكم الأمور إن شاء الله، إلا إذا اهملتوا بزيادة ☹️☹️☹️
  • قيّم طريقة مذاكرتك، والحَكم درجاتك بالاختبار… لازم تكون صادق مع نفسك، عشان تكتشف الأخطاء وتعدلها بدري.. دائمًا حط لك خطة تتابع تقدمك وتشوف وين وصلت وهل حققت أهدافك؟ 🤔🤔🤔
  • هذي نصيحة تمنيت أقدمها من قبل، لكن ماعرفتها إلا من قريب، وهي ضمنوا خطتكم الدراسية بكتب USMLE Step 1 مثل First Aid وخلوها جزء أساسي، مفيدة جدًا في كل شيء 👍🏼👍🏼👍🏼
  • وش نسوي خلال الإجازة؟🤷‍♂️🤷‍♀️  سؤال دائمًا يتكرر…
    الإجازة وقتك الخاص، محد يفرض عليك شيء. لكن إذا انصحكم بشيء حطوا خطط تراجعون معلوماتكم ويكون عن طريق كتب التحضير لاختبارات الـ USMLE وبالنسبة لي هذا انجاز كافي، الباقي ممكن تتعرفون على محتوى السنة القادمة، اطلعوا عليه واشبعوا فضولكم.
    استمتعوا، تابعوا مسلسلاتكم وأفلامكم، أقرأ كتابًا، غيروا جو … وانتبهوا لأوزانكم 🤣🤣🤣🤣
    الأهم والمهم إنك تطلع من الإجازة وأنت راضي بحيث تبدأ عامك الجديد بكل نشاط وحيوية ونفسية حلوة… 💛💛💛💛🤩🤩

ما ذاكرت؟؟؟ ماهي نهاية العالم لذا لا تحزن!! 💃🏻🕺🏻

باقي النصائح نفسها اللي ذكرتها بمدونة سنة ثانية.


ختامًا

أشكرك لوصولك هنا.. أتمنى قدمت لك محتوى مفيد وخفيف يشبع فضولك ويجيب عن تساؤلاتك.
تذكر أن كل شخص له تجربة ورحلة، لذا لاتستنسخ رحلة غيرك وكن أنت قبطان سفينتك، وأحسن القيادة فالموج قادم من فوقك ومن بين قدميك 🌊 🌊

عادةً هنا مساحتي الخاصة أعبر عن مشاعري، لكن حقيقة المشاعر تتضارب والكلمات لاتكفي الوصف.
لا أعرف السبب لكن وصولي إلى هذه المرحلة ومشاركتكم المشوار، خصوصًا بعد انتصافه شعور مرعب، وتجتمع الرغبة والرهبة في آن واحد… شعور الفرح والحزن، الضحك والبكاء كما قلتها بدايةً شتات…

لا زلت أتخيل نفسي طالب المرحلة الثانوية وجل اهتمامه قبول الجامعة، أما الآن فقد كبرت المسؤولية وتعاظمت، السنوات تتراكض وكأني البارحة اتحرى نتائج قبولي والآن وصلت إلى هنا …
الشكر لله دائمًا وأبدًا، لا أعلم لماذا أنا لماذا عبدالعزيز، ما أعلمه أن الله كريم معطاء يغرق عبده بفضله وكرمه ورحمته…
امتنانٌ عظيم لوالديّ فمابلغت مبلغي ولا نصفه بدونهما… وذلك الشعور بسبب نظرة اخوتي لي، يكررون تلك الكلمات دائما أخونا الدكتور!!! شعور المسؤولية؟ ثقل الكلمات ووزنها كفيل بجعلك تحمل همّ الأخ والقدوة لهم وتقدم وتبذل قصارى جهدك…
أصدقائي ودعمهم اللامتناهي كوني الوحيد بينهم أدرس الطب، سؤالهم استفسارهم وحتى عتابهم. يادكتورنا شد حيلك … يرددونها في كل لحظة وحين. فاللهم اجعلنا أهل هذا التكليف  🤲🏻❤️

دائمًا أقول أن دراسة الطب ليست صعبة لكن تحتاج الصبر وطولة البال …

أجزل الشكر لكل من ساعد وراجع المدونة 
وساهم أن تكون بهذه الصورة
 لاتنسوهم من دعواتكم الصادقة

اِلْبَسوا الكمامة، واغسلوا أيديكم، وتباعدوا… لتبقوا سالمين …
حفظكم الله من كل شر ومكروه أنتم ومن تحبون. 🤍🤍🤍 

“Medicine heals doubts as well as diseases.”
-Karl Marx

من باب الذكرى كُتبت في زمن كورونا (Covid-19) …

لاتنسوني من دعواتكم 🤲🏻🤍

السبت 14 شوال 1441 هـ / 6 يونيو 2020
عبدالعزيز الفايز